Jio-Airtel અને VI એ ભારતમાં ત્રણ મોટા ટેલિકોમ ઓપરેટરો છે. ટેલિકોમ ઈન્ડસ્ટ્રીમાં ખાસ કરીને Jioનું વર્ચસ્વ છે. પરંતુ હવે ત્રણેય કંપનીઓને ટક્કર આપવા માટે ઝૂમ મેદાનમાં ઉતર્યું છે. વાસ્તવમાં વેબ કોન્ફરન્સ કંપની ઝૂમ વિડિયો કોમ્યુનિકેશન્સને ભારતીય ટેલિકોમ લાઇસન્સ મળી ગયું છે અને હવે કંપની એન્ટરપ્રાઇઝ ગ્રાહકોને ટેલિફોન સેવા પ્રદાન કરશે. યુએસ સ્થિત આ કંપની પહેલાથી જ એપ અને વેબ પર લોકોને વીડિયો અને વોઈસ કોલ સર્વિસ પૂરી પાડે છે. હવે કંપનીને ટેલિકોમ સેવાઓ માટે ડિપાર્ટમેન્ટ ઓફ ટેલિકોમ્યુનિકેશન તરફથી લાઇસન્સ પણ મળ્યું છે જેમાં નેશનલ લોંગ ડિસ્ટન્સ અને ઈન્ટરનેશનલ લોંગ ડિસ્ટન્સ કોલનો સમાવેશ થાય છે.
આ લાયસન્સની મદદથી કંપની ભારતમાં કાર્યરત MNCs અને વ્યવસાયોને તેની ક્લાઉડ આધારિત પ્રાઈવેટ બ્રાન્ચ એક્સચેન્જ (PBX) સેવા ‘ઝૂમ ફોન’ પ્રદાન કરશે. હાલમાં, કંપની આ સેવા 47 જુદા જુદા દેશોમાં ઓફર કરે છે, જેમાં ગ્રાહકોને ફોન નંબર અને વિવિધ ટેરિફ પ્લાન મળે છે. કંપનીનું કહેવું છે કે ઝૂમ ફોનની મદદથી કંપનીઓ તેમના કર્મચારીઓ સાથે વધુ સારી રીતે કામ કરી શકે છે અને તેનાથી ગ્રાહકોનો અનુભવ પણ વધશે. પ્રાઈવેટ બ્રાન્ચ એક્સચેન્જ (PBX) સ્થાનિક ટેલિફોન એક્સચેન્જ તરીકે કામ કરે છે જે કંપનીઓને કોન્ફરન્સ કૉલ્સનું સંચાલન કરવામાં મદદ કરે છે.
કોવિડ યુગમાં ઝૂમનો ઘણો ઉપયોગ થતો હતો
ઝૂમ એપ્લિકેશન કોરોના દરમિયાન શાળાના બાળકો, ઓફિસ જતા કર્મચારીઓ અને સરકારોએ પણ તેમના કામ માટે તેનો ઉપયોગ કર્યો હતો. ઝૂમ એપ્લિકેશન યુઝર્સને ખૂબ જ પસંદ આવી હતી. તમે તેના દ્વારા ઘણા લોકો સાથે સરળતાથી મીટિંગ કરી શકો છો. ઝૂમની વધતી જતી લોકપ્રિયતાને જોઈને પાછળથી WhatsAppએ પણ WhatsApp પર ગ્રુપ વીડિયો કૉલની સુવિધા વધારી. હવે કંપનીને ટેલિકોમ ઈન્ડસ્ટ્રીનું લાઇસન્સ પણ મળી ગયું છે, જેના પછી ઝૂમની લોકપ્રિયતા વધુ વધશે.
Advertisement