કેરળમાં બે મહિલાઓની બલિ ચઢાવવામાં આવી! પોલીસને શંકા-આરોપી દંપત્તિએ પણ માનવ માંસ ખાધું

તિરુવનંતપુરમઃ કેરળમાં બે મહિલાઓની હત્યાનો મામલો સામે આવ્યો છે. આ હત્યાકાંડમાં બલિદાનની બાબતનો સનસનીખેજ ખુલાસો થયો છે. કોચી પોલીસ કમિશનરે એનડીટીવીને જણાવ્યું છે કે તેમને શંકા છે કે આરોપી દંપતીએ તે મહિલાઓનું માંસ પણ ખાધું છે. ઉલ્લેખનીય છે કે પોલીસે ગઈકાલે ત્રણ આરોપી મસાજ થેરાપિસ્ટ ભગવંત સિંહ, તેમની પત્ની લાલી અને તેમના એજન્ટ મોહમ્મદ શફીની ધરપકડ કરી હતી.

એવું કહેવાય છે કે આરોપી દંપતીએ તંત્ર-મંત્ર દ્વારા પૈસા અને પ્રસિદ્ધિ મેળવવા માટે માનવ બલિદાન આપ્યું હતું. તેનો એજન્ટ શફી બંને મહિલાઓને લાલચ આપીને આરોપીના ઘરે લાવ્યો હતો જ્યાં તેમની બલિદાન આપીને દફનાવવામાં આવી હતી. આ ઘટના બાદ પોલીસ છેલ્લા કેટલાક દિવસોમાં ગુમ થયેલા લોકોના કેસની પણ તપાસ કરી રહી છે.

કોચીના પોલીસ કમિશનર નાગરાજુ ચકિલાગે જણાવ્યું હતું કે, “આ વાત પર વિશ્વાસ કરવા માટે અમારી પાસે પૂરતા પુરાવા નથી. ફોરેન્સિક તપાસ અને પુરાવા એકત્ર કરવાનું ચાલુ રહેશે.” આરોપીને પાગલ અને મનોરોગી ગણાવતા તેમણે કહ્યું કે ગુનાનો મૂળ હેતુ જાતીય આનંદ હોવાનું જણાય છે.

રોસેલિન અને પદમાને બાંધીને નિર્દયતાથી મારી નાખવામાં આવ્યા હતા. તેમના શરીરના નાના-નાના ટુકડા કરી તેનો એક ભાગ દાટી દેવામાં આવ્યો હતો. પોલીસે કહ્યું કે આ માનવ બલિદાન આર્થિક મુશ્કેલીઓને ખતમ કરવા માટે આપવામાં આવ્યું હતું. પોલીસે જણાવ્યું કે રોસેલિન જૂનમાં અને પદમા સપ્ટેમ્બરમાં ગુમ થઈ હતી.

પોલીસ સૂત્રોએ જણાવ્યું કે મસાજ થેરાપિસ્ટ ભગવંત સિંહ અને તેની પત્નીની પૂછપરછ દરમિયાન ખુલાસો કર્યો છે કે તેઓ પીડિતાનું માંસ પણ ખાતા હતા. પોલીસે આ મામલાની તપાસ માટે વિશેષ ટીમની રચના કરી છે. દંપતી અને તેમના એજન્ટને 26 ઓક્ટોબર સુધી પોલીસ કસ્ટડીમાં મોકલવામાં આવ્યા છે. પોલીસ પદમા ગુમ થયાની તપાસ કરી રહી હતી ત્યારે જ આ હત્યાઓ વિશે જાણ થઇ હતી. મહિલાઓના ફોન એજન્ટ મોહમ્મદ શફી પાસે મળી આવ્યા હતા, જેણે પૂછપરછ દરમિયાન અપહરણની વાત સ્વીકારી હતી.

પોલીસ કમિશનરે જણાવ્યું હતું કે ગુમ થયેલી મહિલાઓ અંગે અમારી તપાસ દરમિયાન જાણવા મળ્યું હતું કે તિરુવલ્લામાં દંપતીના ઘરે તેમની હત્યા કરવામાં આવી હતી અને લાશના ટુકડા કરી દફનાવવામાં આવ્યા હતા. ધન લાભ મેળવવા માટે માનવ બલિદાનનો કેસ હતો. મંગળવારે આરોપીઓની ધરપકડ કરવામાં આવી હતી. ભાજપના વરિષ્ઠ નેતા પ્રકાશ જાવડેકરે બંને મહિલાઓના બલિદાનની ઘટનાને વખોડીને કેરળની સીપીઆઈ(એમ)ની આગેવાનીવાળી સરકાર પર નિશાન સાધ્યું છે. તેમણે કહ્યું કે રાજ્યમાં મહિલાઓ વિરુદ્ધના ગુનાઓ વધી રહ્યા છે.