OTT પ્લેટફોર્મના કન્ટેન્ટમાં હવે તમાકુની ચેતવણી ફરજિયાત, ‘વર્લ્ડ નો ટોબેકો ડે’ પર સરકારનો મોટો નિર્ણય

દિલ્હી: કેન્દ્રીય આરોગ્ય મંત્રાલયે OTT પ્લેટફોર્મ પર તમાકુ વિરોધી ચેતવણીઓ માટે નવા નિયમો જારી કર્યા છે. આ નોટિફિકેશન OTT પ્લેટફોર્મ્સ માટે કન્ટેન્ટમાં તમાકુ વિરોધી ચેતવણી સંદેશા દર્શાવવાનું ફરજિયાત બનાવે છે. તેમાં જણાવવામાં આવ્યું છે કે ઓનલાઈન કન્ટેન્ટ પબ્લિશર્સ નવા નિયમોનું પાલન કરવામાં નિષ્ફળ જશે તો કેન્દ્રીય સ્વાસ્થ્ય મંત્રાલય અને માહિતી અને પ્રસારણ મંત્રાલય કડક કાર્યવાહી કરશે.

વર્લ્ડ નો ટોબેકો ડે પર આરોગ્ય મંત્રાલયે જાહેરનામુ બહાર પાડ્યું

વર્લ્ડ નો ટોબેકો ડે પર આરોગ્ય મંત્રાલયે એક જાહેરનામુ બહાર પાડ્યું છે. આ પછી, નેટફ્લિક્સ, એમેઝોન પ્રાઇમ, હોટસ્ટાર અને સોની લિવ જેવા તમામ OTT પ્લેટફોર્મ માટે કન્ટેન્ટ સાથે તમાકુ વિરોધી ચેતવણીઓ દર્શાવવી ફરજિયાત રહેશે. સિનેમા હોલ અને ટેલિવિઝન ચેનલોમાં ફિલ્મ અને ટેલિવિઝન કાર્યક્રમોની શરૂઆતમાં અને મધ્યમાં ઓછામાં ઓછી ત્રીસ સેકન્ડની તમાકુ વિરોધી સ્વાસ્થ્ય ચેતવણીઓ પ્રદર્શિત કરવી અગાઉથી જ ફરજિયાત છે.

30 સેકન્ડની ચેતવણી

નવા નિયમ અનુસાર, તમાકુ ઉત્પાદનો અથવા તેના ઉપયોગથી થતી સમસ્યાઓ વિશે OTT પ્લેટફોર્મ પર માહિતી આપવી ફરજિયાત કરવામાં આવી છે. ઑનલાઇન કન્ટેન્ટની શરૂઆતમાં અને મધ્યમાં ઓછામાં ઓછી ત્રીસ સેકન્ડનો જાગૃતિ ફેલાવતો વિડિયો ચોક્કસપણે હોવો જ જોઈએ. OTT પ્લેટફોર્મ તમાકુ ઉત્પાદનોના પ્રદર્શન દરમિયાન અથવા પ્રોગ્રામમાં તેના ઉપયોગ દરમિયાન સ્ક્રીનના નીચેના ભાગે એક મુખ્ય સ્થિર સંદેશ તરીકે તમાકુ વિરોધી સ્વાસ્થ્ય ચેતવણી પણ પ્રદર્શિત કરશે.

આરોગ્ય અને પરિવાર કલ્યાણ મંત્રાલયે OTT પ્લેટફોર્મ પર તમાકુ વિરોધી ચેતવણીઓ માટે નવા નિયમોનું જાહેરનામુ બહાર પાડ્યું છે. આ નોટિફિકેશન OTT પ્લેટફોર્મને તમાકુ વિરોધી ચેતવણી સંદેશા પ્રદર્શિત કરવાનું ફરજિયાત બનાવે છે. માર્ગદર્શિકાનું પાલન ન કરવા પર કડક પગલાં લેવામાં આવશે.