દિલ્હી: કાશ્મીરી ગેટ પાસે ખાલિસ્તાન તરફી સૂત્રો લખવાનો મામલો, દિલ્હી પોલીસે FIR નોંધી

કેનેડામાં ભારત વિરુદ્ધ નાપાક હરકતો કરી રહેલા ખાલિસ્તાની આતંકવાદીઓએ દિલ્હીમાં પણ આવું જ કૃત્ય કર્યું છે. અલગતાવાદીઓએ પોતાની હાજરી નોંધાવવા માટે દિલ્હીમાં કાશ્મીરી ગેટ પાસે ફ્લાયઓવરની નીચે દીવાલો પર ખાલિસ્તાનના સમર્થનમાં સૂત્રો લખ્યા હતા. બુધવારે બનેલી આ ઘટના બાદ પોલીસ ટીમે તાત્કાલિક કાર્યવાહી કરીને સ્પ્રે પેઈન્ટથી દીવાલ પરથી સૂત્રો હટાવી દીધા છે. આ સાથે જ પોલીસે આઈપીસીની કલમ હેઠળ કેસ નોંધ્યો છે. સૂત્રો લખનારા લોકોની શોધખોળ કરવામાં આવી રહી છે.

દિલ્હી પોલીસના એક વરિષ્ઠ અધિકારીએ જણાવ્યું કે, પુલની બંને બાજુએ ‘દિલ્હી બનેગા ખાલિસ્તાન’ જેવા સૂત્રો લખેલા હતા. ત્યાંથી પસાર થઈ રહેલા લોકોએ આ સૂત્રો જોયા હતા. પોતાનું નામ જાહેર ન કરવાની વિનંતી કરતાં એક રાહદારીએ અમને ફોન કરીને આ અંગે સૂચના આપી હતી. આઈપીસીની કલમ 153 હેઠળ કેસ નોંધવામાં આવ્યો છે અને આરોપીની ધરપકડ માટે તપાસ હાથ ધરવામાં આવી છે. પોલીસ આજુબાજુમાં લગાવવામાં આવેલા સીસીટીવી ફૂટેજની તપાસ કરી રહી છે. અધિકારીએ વધુમાં કહ્યું કે, ટૂંક સમયમાં જ આરોપીઓની ધરપકડ કરી લેવામાં આવશે.

દરમિયાન, કેનેડામાં રહેતા ખાલિસ્તાની આતંકવાદી અને શીખ ફોર જસ્ટિસના પ્રમુખ ગુરુપતવંત સિંહ પન્નુને પણ એક વીડિયો જારી કરીને દિલ્હીમાં ખાલિસ્તાની સૂત્રો લખવાની વાત કરી હતી. એટલું જ નહીં તેણે દેશની સંસદ અને વર્લ્ડ કપ મેચો દરમિયાન હુમલાની ધમકી પણ આપી છે.

ખાલિસ્તાની આતંકવાદીઓની કમર તોડવા માટે NIAની મોટી બેઠક

પંજાબમાં ખાલિસ્તાની આતંકવાદીઓને કાબૂમાં લેવા માટે દેશની તમામ સુરક્ષા એજન્સીઓ એક થઈ ગઈ છે. આ અંતર્ગત NIAએ ખાલિસ્તાની ગતિવિધિઓ, આતંકવાદી ગતિવિધિઓ, ટેરર ​​ફંડિંગ અને ગેંગસ્ટર્સને ખતમ કરવા માટે 5-6 ઓક્ટોબરે દિલ્હીમાં એક મોટી બેઠક બોલાવી છે. આ ખૂબ જ મહત્વપૂર્ણ બેઠકમાં NIA ચીફ, IB ચીફ, RAW ચીફ અને ATSના વડાઓ ભાગ લેશે. સૂત્રો પાસેથી મળેલી માહિતી મુજબ આ બેઠકનો મુખ્ય એજન્ડા ખાલિસ્તાની આતંકવાદીઓની કમર તોડી નાંખવાનો છે.

તાજેતરમાં કેનેડામાં રહેતા હિન્દુઓને ધમકી આપનાર ખાલિસ્તાની આતંકવાદી પન્નુન સામે મોટી કાર્યવાહી કરવામાં આવી હતી. નેશનલ ઇન્વેસ્ટિગેશન એજન્સીએ આતંકવાદી અને પ્રતિબંધિત શીખ ફોર જસ્ટિસના નેતા ગુરપતવંત સિંહ પન્નુન વિરુદ્ધ મોટી કાર્યવાહી કરીને તેની સંપત્તિ જપ્ત કરી હતી. પંજાબમાં NIA દ્વારા જપ્ત કરાયેલી પન્નુનની સંપત્તિમાં અમૃતસર જિલ્લામાં તેના મૂળ વતનના ગામમાં 46 કનાલ ખેતીની મિલકત અને ચંદીગઢના સેક્ટર 15Cમાં તેનું ઘર સામેલ છે. જપ્તીનો અર્થ એ છે કે પન્નુ આ મિલકત પર હકનો દાવો કરી શકશે નહીં, હવે તે સરકારના અધિકારક્ષેત્રમાં આવી જશે. આ પહેલા પણ 2020માં તેની સંપત્તિ જપ્ત કરવામાં આવી હતી.