પાકિસ્તાનમાં ઇમરાન ખાનની ધરપકડ બાદ હિંસક પ્રદર્શન ચાલી રહ્યાં છે. આ વચ્ચે પાકિસ્તાનમાં ઇમરાન ખાનની પાર્ટીના નેતાઓની ધરપકડ કરવામાં આવી રહી છે. બીબીસી ઉર્દીના એક રિપોર્ટ પ્રમાણે પાકિસ્તાનના પૂર્વ વિદેશ મંત્રી અને પાકિસ્તાન તહરીક-એ-ઇન્સાફ નેતા શાહ મહેમુદ કુરૈશીની પણ ધરપકડ કરવામાં આવી છે.
Advertisement
Advertisement
પાકિસ્તાની પીએમ શેહબાઝ શરીફે બુધવારે રાત્રે દેશના નામ સંબોધનમાં હિંસા કરનારાઓને કડક શબ્દોમાં ચેતવણી આપતા કહ્યું છે કે, હિંસા કરનારાઓને કડકમાં કડક સજા આપવામાં આવશે. આ વચ્ચે પાકિસ્તાનમાં હિંસાના કારણે 10 લોકોના મોત પણ થઈ ગયા છે.
પાકિસ્તાનમાં ઇમરાન ખાનની પાર્ટીના નેતાઓની પણ ધરપકડ કરવામાં આવી રહી છે. કુરૈશીએ ધરપકડ પહેલા એક રેકોર્ડેડ વીડિયોમાં કહ્યું, પોલીસ આવી ગઈ છે મને ધરપકડ કરવા માટે. હું એક સંદેશ આપવા માંગું છું. આ આંદોલન આઝાદીની લડાઈ છે અને આપણે તેમાં ભાગ લેવાનો છે. આજે ઈમરાન ખાન તેમના જાપ્તામાં છે, જેમનો જીવ ખતરામાં છે.
ઇમરાનની ધરપકડ પછી પાકિસ્તાન આખામાં હિંસક દેખાવો
પાકિસ્તાનમાં પૂર્વ વડાપ્રધાન ઇમરાન ખાનની ધરપકડ બાદ હંગામો મચી ગયો છે. તેમની પાર્ટી પીટીઆઈના કાર્યકરો રસ્તા પર ઉતરી આવ્યા છે. આ દરમિયાન અનેક જગ્યાએ આગચંપીના બનાવો બન્યા છે. પાકિસ્તાનના જુદા જુદા ભાગોમાં પીટીઆઈ કાર્યકર્તાઓ ઉગ્ર વિરોધ કરી રહ્યા છે. પાકિસ્તાનની ન્યૂઝ વેબસાઈટ ડોન અનુસાર, પીટીઆઈના કાર્યકરો લાહોર કેન્ટમાં સૈન્ય અધિકારીઓના રહેણાંક વિસ્તારમાં ઘૂસી ગયા છે અને તોડફોડ કરી રહ્યા છે.
ડોનના રિપોર્ટ અનુસાર PTI સમર્થકો રાવલપિંડીમાં જનરલ હેડક્વાર્ટરની બહાર એકઠા થઈ રહ્યા છે. આ સિવાય સમગ્ર ઈસ્લામાબાદમાં કલમ 144 લાગુ કરવામાં આવી છે. પોલીસે દેખાવકારોને ચેતવણી આપી છે. પેશાવરમાં વિરોધીઓ દ્વારા રેડિયો સ્ટેશનને આગ લગાડવામાં આવી હોવાના સમાચાર છે.
ખૈબર પખ્તુનખ્વા પ્રાંતના લાખી મારવત જિલ્લાની શેરીઓમાં પ્રદર્શનકારીઓ અને પીટીઆઈના કાર્યકરો દ્વારા ઈન્ડસ હાઈવે બ્લોક કરી દેવામાં આવ્યો છે. ઠેર-ઠેર ટાયર સળગાવવામાં આવ્યા છે. પીટીઆઈના કાર્યકરોએ કરાચી અને ઈસ્લામાબાદમાં પણ હંગામો મચાવ્યો હતો.
ઇસ્લામાબાદમાં 5 અધિકારીઓ ઘાયલ, 43 દેખાવકારો ની ધરપકડ
ઇસ્લામાબાદ પોલીસે ટ્વિટ કર્યું કે હિંસક વિરોધ પ્રદર્શનમાં તેમના પાંચ અધિકારી ઘાયલ થયા છે. તેમણે જણાવ્યું કે કલમ 144 તોડવા બદલ 43 પ્રદર્શનકારીઓની ધરપકડ કરવામાં આવી છે. આ પહેલા પેશાવરમાં જે હિંસક વિરોધ નો સાક્ષી હતો, વહીવટીતંત્રે આગામી 30 દિવસ માટે કલમ 144 લાગુ કરી હતી. પોલીસે આંદોલનકારીઓને ચેતવણી આપી છે કે જો તેઓ નિયમોનું પાલન નહીં કરે તો કડક કાર્યવાહી કરવામાં આવશે.
ટ્વિટર, ફેસબુક, યુટ્યુબ પર પ્રતિબંધ
ન્યૂઝ એજન્સી રોયટર્સ અનુસાર, પાકિસ્તાનના અલગ-અલગ ભાગોમાં ઉગ્ર પ્રદર્શનોને જોતા સરકારે ઘણી જગ્યાએ ટ્વિટર, ફેસબુક અને યુટ્યુબ જેવી સોશિયલ મીડિયા સાઇટ્સ પર પ્રતિબંધ લગાવી દીધો છે. આ સિવાય પાકિસ્તાનના મોટા શહેરોમાં મોબાઈલ ડેટા સેવા પણ બંધ કરી દેવામાં આવી છે. બુધવારે પાકિસ્તાનમાં ખાનગી શાળાઓ ખુલવાની શક્યતા ઓછી છે.
Advertisement