ગુજરાત એક્સક્લૂઝિવ સંપાદક : આજે વિશ્વના વિવિધ ભાગોમાં મીડિયા એકમાત્ર સ્ત્રોત બનીને રહી ગયું છે જેનું કામ કોર્પોરેટ ઉદ્યોગોના ઉત્પાદન ગ્રાહકો સુધી પહોંચાડવાનું અને તેનો પ્રચાર કરવાનું છે. જાહેર મીડિયા ઉપભોક્તાવાદ અને પ્રચારનો શિકાર બન્યું છે. વધારે નફો મેળવીને કમાણી કરવા માટે સમાચારને બદલે ઉચ્ચ ટીઆરપી પર ફોકસ કરવામાં આવી રહ્યું છે. જનતા સામે સાચા સમાચારો પહોંચી રહ્યાં નથી. જનતાને સમાચારોના રૂપમાં માત્ર મનોરંજન પીરસવામાં આવી રહ્યું છે.
Advertisement
Advertisement
સમાચારોનું અકાળે મૃત્યું થઈ રહ્યું છે. લોકતંત્રનું પતન થઈ રહ્યું છે. મૌલિક અને નિર્ણાયક સમાચાર બતાવવાનું જોખમ લેવું મુશ્કેલ બની ગયું છે. માધ્યમોમાંથી ગરીબ-મજૂર વર્ગ કે જમીન સંપાદન કે ગ્રામીણ ગરીબીના સમાચાર લગભગ ગાયબ થઈ ગયા છે. મીડિયાને નફો કમાવવાનું માધ્યમ બનાવતા જવલંત મુદ્દાઓ પર સમાધાન કરવામાં આવી રહ્યું છે.
દેશ અને દુનિયામાં પત્રકારિતાનું સ્તર સતત ઘટી રહ્યું છે. આ જ કડીમાં ભારતીય પત્રકારિતાનું પતન થતું જોવા મળી રહ્યું છે. વર્લ્ડ પ્રેસ ફ્રીડમ ઈન્ડેક્સમાં ભારત 150માં સ્થાને આવી ગયું છે. સમાચારોના નામ પર સતત શાબ્દિક વ્યાભિચાર કરવામાં આવી રહ્યો છે. સાચા મુદ્દાઓની માહિતી આપવાની જગ્યાએ ધ્યાન ભટકાવવામાં આવી રહ્યું છે.
ગુજરાતમાં પણ ગણ્યાં-ગાઠ્યા સમાચાર સમૂહો છે, જેઓ જનતાના મુદ્દાઓ ઉઠાવી રહ્યાં છે અને દેશમા પ્રવર્તી રહેલી સમસ્યાઓ વિશે રિપોર્ટ આપે છે.
ગુજરાત એક્સક્લૂઝિવ એપ્રિલ 2019થી ગુજરાતની જનતાને સામે સત્તા અને સમકક્ષના કર્મ અને કૂકર્મોની નિડર-નિષ્પક્ષ અને સમતુલિત થઈને વિવેચના કરી રહ્યું છે. ગુજરાત એક્સક્લૂઝિવ હંમેશા સામાન્ય અને હાંસિયામાં ધકેલાયેલા લોકોને પડખે રહ્યું છે.
કોવિડ મહામારીની કરૂણતા પછી સમાજમાં સારા-નરસા તત્વો માથા ઉચકી રહ્યાં છે. સમાજમાં સતત અસમાનતાની ખાઇ વધી રહી છે. મેન સ્ટ્રીમ મીડિયામાંથી બેકારી-મોંઘવારી જેવા મુદ્દાઓ ગાયબ છે. ગુજરાત એક્સક્લૂઝિવ મોંઘવારી-બેકારી- શિક્ષણ વગેરે જેવા મુદ્દાઓ પર હંમેશા મુખર રહ્યુ છે. આગામી દિવસોમાં બમણી તાકાતથી ગુજરાત એક્સક્લૂઝિવની નવી ટીમ, નવા પ્લેટફોર્મ પર પત્રકારિતાના ધર્મનું પાલન કરશે.
Advertisement