PM મોદીએ KCR પર નિશાન સાધ્યું, કહ્યું- NDAમાં જોડાવા માગતા હતા પણ અમે ઈનકાર કર્યો

આગામી મહિનાઓમાં દેશના પાંચ રાજ્યો છત્તીસગઢ, મધ્યપ્રદેશ, રાજસ્થાન, તેલંગાણા અને મિઝોરમમાં વિધાનસભાની ચૂંટણીઓ યોજાવા જઈ રહી છે. આને લોકસભા ચૂંટણીની સેમીફાઇનલ માનવામાં આવી રહી છે. વડાપ્રધાન નરેન્દ્ર મોદી સતત ચૂંટણી રાજ્યોની મુલાકાત લઈ રહ્યા છે. આ ક્રમમાં ગઈકાલે તેમણે તેલંગાણાના નિઝામાબાદમાં રોડ શો કર્યો અને ત્યારબાદ વિવિધ પ્રોજેક્ટનો શિલાન્યાસ કર્યો. આ અવસર પર પીએમએ જનસભાને પણ સંબોધિત કરી હતી.

નિઝામાબાદમાં જાહેર રેલીને સંબોધતા પીએમ મોદીએ કહ્યું કે તેલંગાણા એક એવું રાજ્ય છે જેણે હંમેશા દેશના વિકાસમાં યોગદાન આપ્યું છે. તેલંગાણામાં દરેક જગ્યાએ પ્રતિભા છે, કેન્દ્ર સરકારમાં રહીને પણ અમે તેલંગાણા માટે જે કંઈ કરી શકીએ તે સતત કરી રહ્યા છીએ.

આ અવસરે પીએમ મોદીએ તેલંગાણાના સીએમ કેસીઆર વિશે મોટો ખુલાસો કર્યો અને કહ્યું કે જ્યારે હૈદરાબાદ મ્યુનિસિપલ કોર્પોરેશનની ચૂંટણીમાં ભાજપે 48 સીટો જીતી ત્યારે કેસીઆરને સમર્થનની જરૂર પડી હતી. આ ચૂંટણી પહેલા તેઓ એરપોર્ટ પર મારું સ્વાગત કરવા આવતા હતા પરંતુ બાદમાં તેમણે અચાનક આમ કરવાનું બંધ કરી દીધું હતું. હૈદરાબાદ મ્યુનિસિપલ કોર્પોરેશનની ચૂંટણી પછી કેસીઆર મને મળવા દિલ્હી આવ્યા અને કહ્યું કે તેઓ એનડીએમાં જોડાવા માગે છે. તેમણે મને તેમનું સમર્થન કરવા કહ્યું, પરંતુ મેં કેસીઆરને કહ્યું કે તમારા કાર્યો એવા છે કે મોદી તમારી સાથે જોડાઈ શકે તેમ નથી.

પીએમ મોદીએ વિપક્ષ પર પ્રહાર કરતા કહ્યું કે થોડાં દિવસો પહેલા સંસદમાં નારી શક્તિ વંદન બિલ પસાર કરવામાં આવ્યું હતું. કોંગ્રેસ અને તેના સહયોગીઓ 30 વર્ષથી તેને અટકાવી રહ્યા હતા. તેમને કોઈની પરવા ન હતી, પરંતુ આ વખતે તમામ ઘમંડી લોકોએ સંસદમાં નારી શક્તિ વંદન કાયદાને મજબૂરીમાં સમર્થન આપ્યું હતું.