CBI અને EDનું નામ બદલીને ‘બીજેપી સેના’ રાખવું જોઈએ, કેજરીવાલે કેન્દ્રને માર્યો ટોણો

દિલ્હી: તમિલનાડુના ઉર્જા મંત્રી વી સેંથિલ બાલાજીની ધરપકડ બાદ રાજકીય નિવેદનબાજી તેજ થઈ ગઈ છે. આ મામલાને લઈને વિપક્ષે ફરી એકવાર મોદી સરકાર પર કેન્દ્રીય તપાસ એજન્સીઓનો દુરુપયોગ કરવાનો આરોપ લગાવ્યો છે. દરમિયાન, દિલ્હીના મુખ્યમંત્રી અરવિંદ કેજરીવાલે સીબીઆઈ અને ઈડીને લઈને ભાજપ પર નિશાન સાધતાં કહ્યું કે આ એજન્સીઓનું નામ બદલીને ‘ભાજપ સેના’ કરવું જોઈએ. આ એજન્સીઓ માત્ર ભાજપનું હથિયાર બની ગઈ છે.

દિલ્હીના મુખ્યમંત્રી અરવિંદ કેજરીવાલે પોતાના ટ્વિટમાં લખ્યું છે કે, CBI અને EDનું નામ બદલીને ‘ભાજપ સેના’ રાખી દેવુ જોઈએ. એક સમય હતો જ્યારે આ તપાસ એજન્સીઓનું સન્માન કરવામાં આવતું હતું. જ્યારે તેઓ કોઈ જગ્યાએ દરોડા પાડતા હતા અથવા કોઈની ધરપકડ કરતા હતા, ત્યારે એવું લાગતું હતું કે તે વ્યક્તિએ કંઈક ખોટું કર્યું હશે. પરંતુ આજે આ એજન્સીઓ ભાજપનું માત્ર રાજકીય હથિયાર બની ગઈ છે.

અગાઉ, આમ આદમી પાર્ટીએ એક નિવેદનમાં કહ્યું હતું કે તેઓ એન્ફોર્સમેન્ટ ડિરેક્ટોરેટ દ્વારા તમિલનાડુના ઉર્જા પ્રધાન સેંથિલ બાલાજીની મોડી રાત્રે થયેલી ધરપકડની સખત નિંદા કરે છે. તેની તબિયત સારી ન હોવા છતાં જે રીતે તેમની ધરપકડ કરવામાં આવી તે અમાનવીય છે અને ED જે રીતે કામ કરી રહી છે તેના પર ગંભીર ચિંતા ઊભી કરે છે. આ ધરપકડ ભારતના વિરોધપક્ષ પર સતત થઈ રહેલા હુમલાનો એક ભાગ છે અને તે આપણી લોકશાહીના પાયાને નબળી પાડે છે. અમે ભાજપના બિનલોકશાહી નિશાનનો ભોગ બનેલા બાલાજી અને તમામ વિપક્ષી નેતાઓ સાથે સંગઠિત થઈને ઊભા છીએ.