કેજરીવાલ સરકારનો મહત્ત્વનો નિર્ણય, આ મંત્રીને સોંપવામાં આવી સેવા અને તકેદારી વિભાગની જવાબદારી

સંસદના બંને ગૃહમાં દિલ્હી સર્વિસ બિલ પાસ થયા બાદ દિલ્હીની કેજરીવાલ સરકારે મહત્ત્વનો નિર્ણય લીધો છે. આ નિર્ણય હેઠળ આતિશીને સેવા અને તકેદારી વિભાગની જવાબદારી સોંપવામાં આવી છે. દિલ્હીના મુખ્યમંત્રી અરવિંદ કેજરીવાલે આતિશીને સર્વિસ અને વિજિલન્સ પોર્ટફોલિયો ફાળવવા માટે લેફ્ટનન્ટ ગવર્નર વીકે સક્સેનાને એક ફાઇલ મોકલી છે. આ બંને વિભાગ અગાઉ સૌરભ ભારદ્વાજ સંભાળતા હતા.

દિલ્હી સર્વિસ બિલ રાજ્યસભામાં પણ પસાર

સંસદના બંને ગૃહોમાં દિલ્હી સર્વિસ બિલ પાસ થયા બાદ આજે અરવિંદ કેજરીવાલ સરકારે એક મોટો નિર્ણય લીધો છે અને આતિશીને બે મહત્વપૂર્ણ વિભાગોની જવાબદારી સોંપી છે. આ નિર્ણય હેઠળ દિલ્હીના મુખ્યમંત્રીએ જે વિભાગોને જવાબદારી સોંપી છે તેમાં દિલ્હી સેવા અને તકેદારી વિભાગનો સમાવેશ થાય છે. નોંધપાત્ર વાત એ છે કે દિલ્હી સર્વિસ બિલ ગઈકાલે રાજ્યસભામાં લાંબી ચર્ચા અને મતદાન બાદ પસાર થઈ ગયું છે.

રાજ્યસભામાં બિલ પાસ થયા બાદ કેજરીવાલે શું કહ્યું?

રાજ્યસભામાં દિલ્હી સર્વિસ બિલ પાસ થયા બાદ દિલ્હીના મુખ્યમંત્રી અરવિંદ કેજરીવાલે કહ્યું કે આના પરથી સ્પષ્ટ થાય છે કે વડાપ્રધાન નરેન્દ્ર મોદી કહી રહ્યા છે કે હું સુપ્રીમ કોર્ટને માનતો નથી. દિલ્હીની જનતાએ આમ આદમી પાર્ટીને વિજયી બનાવીને સ્પષ્ટ કહી દીધું કે દિલ્હીમાં દખલગીરી ન કરે પણ મોદીજી લોકોની વાત સાંભળવા માંગતા નથી. અમિત શાહે સંસદમાં કહ્યું કે અમારી પાસે કાયદો પસાર કરવાની સત્તા છે. તમને લોકો માટે કામ કરવાની સત્તા આપવામાં આવી છે, તેમના અધિકારો છીનવી લેવા માટે નહીં.

દિલ્હીના મુખ્યમંત્રી અરવિંદ કેજરીવાલે વધુમાં કહ્યું હતું કે હું જે કંઈ પણ કરું છું તેમાં દિલ્હીના લોકો મને સાથ આપે છે અને તેમણે મને ચૂંટણીમાં જીતાડીને પોતાનું સમર્થન દર્શાવ્યું છે. ભાજપ અમારા સારા કામને રોકવાનો પ્રયાસ કરી રહી છે. તેઓ વિકાસના કામમાં અવરોધ ઉભો કરી રહ્યા છે. તેઓ મને કામ કરતા રોકવાનો પ્રયાસ કરી રહ્યા છે. આ વખતે જનતા તેમને એકપણ બેઠક જીતવા દેશે નહીં.