છત્તીસગઢમાં વિધાનસભા ચૂંટણી પહેલા કોંગ્રેસનો મોટો દાવ, ટીએસ સિંહદેવને ડેપ્યુટી સીએમ બનાવ્યા

છત્તીસગઢ સહિત દેશના ઘણાં રાજ્યોમાં આ વર્ષના અંતમાં વિધાનસભાની ચૂંટણીઓ યોજાવા જઈ રહી છે. પરંતુ તે પહેલા કોંગ્રેસ એક મોટી રાજકીય રમત રમી છે. કોંગ્રેસે ટીએસ સિંહદેવને રાજ્યના નાયબ મુખ્યમંત્રી બનાવ્યા છે. કોંગ્રેસના મહાસચિવ કેસી વેણુગોપાલે કહ્યું કે કોંગ્રેસ અધ્યક્ષ મલ્લિકાર્જુન ખડગેએ ટીએસ સિંહદેવને છત્તીસગઢના ઉપમુખ્યમંત્રી બનાવવાના પ્રસ્તાવને મંજૂરી આપી દીધી છે.

તેમણે કહ્યું કે ટીએસ સિંહદેવ કોંગ્રેસના નિષ્ઠાવાન નેતા અને કાર્યક્ષમ વહીવટકર્તા છે. રાજ્યના નાયબ મુખ્યમંત્રી તરીકે તેમની સેવાઓ ખૂબ જ લાભદાયી રહેશે. અમને પૂરો વિશ્વાસ છે કે છત્તીસગઢની જનતા મલ્લિકાર્જુન ખડગેના નેતૃત્વમાં કોંગ્રેસને જંગી બહુમતી સાથે ફરીથી ચૂંટણી જીતાડશે.

નવી જવાબદારી મળ્યા બાદ છત્તીસગઢના નાયબ મુખ્યમંત્રી ટીએસ સિંહદેવે મીડિયા સાથે વાત કરતા કહ્યું કે હું આભાર વ્યક્ત કરવા માંગુ છું, કોંગ્રેસ અધ્યક્ષે એક જવાબદારી સોંપી છે.. દરેકને સાથે લઈને ચાલવાનું છે અને મર્યાદિત સમયમાં પણ કોંગ્રેસના સારા માટે, છત્તીસગઢના હિત માટે, લોકોની ભલાઈ માટે આપણે જે કંઈ કરી શકીએ તે કરવાનો પ્રયાસ કરવાનો રહેશે.

ટીએસ સિંહદેવને છત્તીસગઢના નાયબ મુખ્યમંત્રી બનાવવા બદલ અભિનંદન આપતાં મુખ્યમંત્રી ભૂપેશ બઘેલે કહ્યું કે અમે તૈયાર છીએ. નાયબ મુખ્યમંત્રી પદની જવાબદારી માટે મહારાજ સાહેબને ખૂબ ખૂબ અભિનંદન અને શુભેચ્છાઓ.

કોણ છે ટીએસ સિંહદેવ?

ત્રિભુવનેશ્વર શરણ ​​સિંહદેવ એટલે કે ટીએસ સિંહદેવ સરગુજા રાજવી પરિવારના સભ્ય છે. તેઓ આ શાહી પરિવારના 118મા રાજા છે. લોકો તેમને ટીએસ બાબા તરીકે સંબોધે છે. લોકો તેમને રાજા સાહેબ કહે તે તેમને પસંદ નથી. સરગુજા રાજવી પરિવાર ઘણી પેઢીઓથી કોંગ્રેસ સાથે સંકળાયેલો છે.