છત્તીસગઢમાં અમિત શાહે કોંગ્રેસ પર પ્રહારો કર્યા, કહ્યું- સોનિયા-મનમોહને કર્યું 12 લાખ કરોડનું કૌભાંડ

છત્તીસગઢના પ્રવાસે પહોંચેલા કેન્દ્રીય ગૃહમંત્રી અમિત શાહે રાજ્યની તત્કાલીન કોંગ્રેસ સરકાર અને ભૂપેશ બઘેલ સરકાર પર આકરા પ્રહારો કર્યા હતા. બંને સરકારોને કૌભાંડોની સરકાર ગણાવતા શાહે કહ્યું કે સોનિયા ગાંધી અને મનમોહન સિંહે 10 વર્ષ સુધી શાસન કર્યું. આ દરમિયાન તેમણે રૂ.12 લાખ કરોડનું કૌભાંડ કર્યું. બીજી તરફ નવ વર્ષમાં એક પણ વ્યક્તિ મોદીજી પર ભ્રષ્ટાચારનો આરોપ લગાવી શકી નથી.

છત્તીસગઢના દુર્ગમાં જનસભાને સંબોધતા અમિત શાહે કહ્યું કે બઘેલ સરકાર વચનો તોડનારી સરકાર છે. તેમણે દારૂબંધીની જાહેરાત કરી પરંતુ દારૂની હોમ ડિલિવરી શરૂ કરી દીધી, બેરોજગારી ભથ્થું આપવાનું વચન આપ્યું, પણ તે આપવામાં આવ્યું નહીં. અમારી રમણસિંહની સરકારમાં તેંદુ પત્તાના રેટ અને નાણાં બંને મળી જતા હતા, પરંતુ આજે ગરીબો અને આદિવાસીઓના લગભગ 500 કરોડ રૂપિયા ચૂકવવાના બાકી છે.

જય શ્રી રામના જય ઘોષ સાથે જાહેર સભાનો પ્રારંભ

ગૃહમંત્રી અમિત શાહે દુર્ગના રવિશંકર સ્ટેડિયમમાં જય શ્રી રામના જય ઘોષ સાથે જાહેર સભાની શરૂઆત કરી હતી. અમિત શાહે કહ્યું કે 2014ની લોકસભા ચૂંટણીમાં આપ લોકોએ છત્તીસગઢમાં 11માંથી 10 સીટો આપી હતી. અમિત શાહે કહ્યું કે જ્યારે સોનિયા અને મનમોહન સિંહ સત્તામાં હતા ત્યારે દેશમાં આતંકવાદી ઘટનાઓ બનતી રહેતી હતી. પાકિસ્તાનીઓ ઘૂસણખોરી કરીને સૈનિકોના માથા કાપી નાખતા હતા. મનમોહન સિંહની સરકારને તેનો અફસોસ પણ થતો ન હતો. મોદીજીની સરકાર આવી અને ઉરી-પુલવામા હુમલાનો જવાબ તેમના ઘરમાં એર સ્ટ્રાઈક દ્વારા આપ્યો.

તેઓ કહેતા હતા કે કલમ 370 હટાવાશે તો લોહીની નદીઓ વહેશે

સમારોહને સંબોધતા ગૃહમંત્રી અમિત શાહે વધુમાં કહ્યું કે, કોંગ્રેસે 70 વર્ષ સુધી કલમ 370ને બાળકની જેમ સંભાળીને રાખી હતી. જ્યારે કલમ 370 હટાવવામાં આવી ત્યારે રાહુલ બાબાના નેતૃત્વમાં કોંગ્રેસના નેતાઓ કહેતા હતા કે તેને હટાવો નહીં, કાશ્મીરમાં લોહીની નદીઓ વહેશે. હવે કલમ 370 હટાવી દેવામાં આવી છે, લોહીની નદીઓ તો દૂર, એક પથ્થર પણ હલ્યો નથી. મોદી સરકારના નવ વર્ષ ભારતના ગૌરવ, ગરીબ કલ્યાણ, ભારતના ઉત્થાનના નવ વર્ષ છે. અમારી સરકારે ગરીબોના કલ્યાણ માટે ઘણું કામ કર્યું છે.