અમદાવાદઃ ગુજરાતમાં એક તરફ મ્યુનિસિપલ કોર્પોરેશનના અધિકારીઓની નિમણૂંક કરવામાં આવી રહી છે, તો બીજી તરફ પ્રદેશ ભાજપમાંથી વધુ એક રાજીનામાના સમાચાર સામે આવ્યા છે. પંકજ ચૌધરીએ ભાજપના પ્રદેશ મંત્રી પદેથી રાજીનામું આપી દીધું છે. તેમણે શા માટે રાજીનામું આપ્યું તે અંગે હજુ સુધી કોઈ માહિતી સામે આવી નથી. પંકજ ચૌધરીએ પણ રાજીનામા અંગે કોઈ પ્રતિક્રિયા આપી નથી. જ્યારે તેમને પ્રશ્ર પૂછવામાં આવ્યો ત્યારે તેમણે મૌન જાળવ્યું હતું.
Advertisement
Advertisement
પંકજ ચૌધરી ગુજરાત ભાજપના પ્રદેશ મંત્રી હતા, તેમણે તેમના પદ પરથી રાજીનામું આપી દીધું છે. એક મહિના પહેલાં જ તેમણે રાજીનામું આપી દીધું હોવાની ચર્ચા ચાલી રહી છે. એટલું જ નહીં, રાજકીય વર્તુળોમાં કેટલાંક લોકો એવું કહી રહ્યા છે કે પંકજ ચૌધરીએ પોતે રાજીનામુ આપ્યું છે, તો કેટલાક લોકો માની રહ્યા છે કે પાર્ટી હાઈકમાન્ડે જબરદસ્તી તેમનું રાજીનામું લઈ લીધું છે. પરંતુ, સતત રાજીનામાના કારણે ભાજપને લોકસભાની ચૂંટણીમાં મુશ્કેલીઓનો સામનો કરવો પડી શકે છે.
સૌથી મહત્વની વાત એ છે કે ગુજરાતના ભારતીય જનતા પાર્ટીના બે મહામંત્રીઓ ભાર્ગવ ભટ્ટ અને પ્રદીપસિંહ વાઘેલાએ અગાઉ રાજીનામું આપ્યું હતું, ત્યારબાદ હવે પ્રદેશ મંત્રી પંકજ ચૌધરીએ પણ રાજીનામુ આપી દીધું છે. થોડાં જ મહિનામાં ત્રીજા સર્વોચ્ચ પદ પર રહેલા વ્યક્તિએ રાજીનામુ આપીને પાર્ટીને મોટો ઝટકો આપ્યો છે. તમને જણાવી દઈએ કે પંકજ ચૌધરી ગુજરાત ભાજપના મંત્રી હતા, તેમને ભાજપ યુવા મોરચાના પ્રભારી તરીકે પણ જવાબદારી સોંપવામાં આવી હતી. હવે તેમને ભાજપ યુવા મોરચાના પ્રભારી પદની જવાબદારીમાંથી પણ મુક્ત કરવામાં આવ્યા છે. હવે તેઓ માત્ર ભારતીય જનતા પાર્ટીના કાર્યકર રહી ગયા છે.
ઉલ્લેખનીય છે કે ગુજરાત ભારતીય જનતા પાર્ટીના પ્રદેશ મહામંત્રી પ્રદીપસિંહ વાઘેલાએ ગયા મહિને રાજીનામુ આપી દીધું હતું. દાવો કરવામાં આવ્યો હતો કે તેમને ભાજપ કાર્યાલયમાં પ્રવેશ આપવામાં આવતો ન હતો. તેના પછી વડોદરા શહેર ભાજપ મહામંત્રી સુનિલ સોલંકીએ પણ રાજીનામુ આપી દીધું હતું. હવે પંકજ ચૌધરીએ પ્રદેશ મંત્રી પદેથી રાજીનામું આપી દીધું છે, તે પછી બાદ એવો દાવો કરવામાં આવી રહ્યો છે કે ગુજરાત ભાજપમાં આંતરિક વિખવાદ શરૂ થઈ ગયો છે.
Advertisement