Gujarat Exclusive > ગુજરાત > મધ્ય ગુજરાત > અમદાવાદીઓ માટે રાહતના સમાચાર: 15 દિવસમાં કોરોનાના દર્દીઓનો રિકવરી રેટ 140% વધ્યો

અમદાવાદીઓ માટે રાહતના સમાચાર: 15 દિવસમાં કોરોનાના દર્દીઓનો રિકવરી રેટ 140% વધ્યો

0
269

અમદાવાદ: રાજયમાં કોરોના વાયરસના વધી રહેલા કેસ સામે તંત્ર પણ ચિંતામાં જોવા મળ્યું હતું. પરંતુ અમદાવાદ માટે કોરોના વાયરસને લઈ રહાત જોવા મળી રહી છે. શહેરમાં છેલ્લા 15 દિવસમાં કોરોનાના દર્દીઓની રિકવરી રેટ 140% વધી ગયો છે. ત્યારે ગત રોજ અમદાવાદ મ્યુનિસિપલ કોર્પોરેશનના કમિશનર અને વિવિધ ઝોનના ડેપ્યુટી મ્યુનિસિપલ કમિશનર સાથે મીટિંગનું આયોજન કર્યું હતું. તેમાં જણાવ્યું હતું કે, 5 મેના રોજ અમદાવાદ શહેરનો રિકવરી રેટ 15.85 ટકા હતો જે 15 દિવસમાં (21મી મે) રોજ 9 ગણો વધીને 140 ટકા થઈ ગયો છે. તેની સામે ગુજરાતનો રિકવરી રેટ 92 ટકા અને દેશનો રિકવરી રેટ 43 ટકા છે.

અમદાવાદ મ્યુનિસિપલ કોર્પોરેશનના અધિકારીઓએ જણાવ્યું કે, હોસ્પિટલમાંથી ડિસ્ચાર્જ થનારા દર્દીઓની વધતી સંખ્યા પાછળનું કારણ ICMRના દિશા-નિર્દેશો પણ હોઈ શકે છે. ICMRની ગાઈડલાઈન મુજબ કોરોનાનો રિપોર્ટ કર્યા વગર દર્દીને ડિસ્ચાર્જ આપવામાં આવે છે. આ સિવાય 14 દિવસમાં દર્દીમાં કોરોનાનો કોઈ લક્ષણો ન જણાય તો તેને ડિસ્ચાર્જ આપી શકાય છે.

અધિકારીઓનું કહેવું છે કે, આઇસીએમઆરના દિશા-નિર્દેશો ઉપરાંત હોસ્પિટલ અને કોવિડ કેર સેન્ટરમાં ફરજ બજાવતો સ્ટાફ પણ કોરોનાનો રિકવરી રેટ વધારવા પાછળ જવાબદાર છે. કારણ કે તેઓ દર્દીની સારી રીતે સાર સંભાળ રાખે છે. અધિકારીઓએ જણાવ્યું કે, અમદાવાદમાં સર્વેલન્સ કરતી ટીમોની સંખ્યા પણ વધારવામાં આવી રહી છે. પહેલા સર્વેલન્સની 318 ટીમો હતી જે હવે વધીને 616 થઈ ગઈ છે. જે કોરોનાના દર્દીઓની ઝડપથી ઓળખ કરીને રિકવરી રેટ વધારવામાં સારી ભૂમિકા ભજવશે.

અમદાવાદમાં શુક્રવાર સાંજ સુધી છેલ્લા 24 કલાકમાં કોરોનાના 275 નવા કેસ નોંધાયા છે. આ સાથે જ અમદાવાદમાં કોરોનાના કુલ કેસની સંખ્યા 9,724 થઈ ગઈ છે. વધુ 26 મૃત્યુ સાથે કુલ મૃત્યુઆંક 645 થઈ ગયો છે. અમદાવાદમાં અત્યાર સુધી કુલ 3,658 લોકો ડિસ્ચાર્જ થયા છે. હાલમાં અમદાવાદમાં 5,421 એક્ટિવ કેસ છે. જો આજે પણ 275થી વધુ કેસ સામે આવે તો અમદાવાદમાં કોરોનાના કેસોની સંખ્યા 10 હજારને પાર થઈ જશે.

લોકડાઉન 4.0ને લઈ નીતિન પટેલનું મોટું નિવેદન