Gujarat Exclusive > ગુજરાત > મધ્ય ગુજરાત > ધો. 9થી 12ના વિદ્યાર્થીઓની પ્રથમ કસોટી માટેના પ્રશ્નપત્રો શાળા કાઢી શકશે

ધો. 9થી 12ના વિદ્યાર્થીઓની પ્રથમ કસોટી માટેના પ્રશ્નપત્રો શાળા કાઢી શકશે

0
90
  • શાળા સંચાલકોની રજૂઆતોના પગલે બોર્ડ દ્વારા નિર્ણય કરવામાં આવ્યો

  • આગામી ધો.9થી 12ની પ્રથમ કસોટી 18થી 27મી ઓક્ટોબર દરમિયાન યોજાશે

ગાંધીનગર: રાજ્યમાં ધો.9થી 12ના વિદ્યાર્થીઓની પ્રથમ કસોટી માટે ખાનગી શાળાઓ પોતાની રીતે પ્રશ્નપત્ર કાઢી પરીક્ષા લઈ શકશે. તાજેતરમાં ખાનગી શાળા સંચાલક મંડળ દ્વારા પ્રશ્નપત્રના ફરજિયાત ઉપયોગ સામે રજૂઆત કરી હતી. જેના પગલે હવે બોર્ડે પ્રશ્નપત્રનો ફરજિયાત ઉપયોગ કરવાના બદલે શાળાઓને પોતાની રીતે પ્રશ્નપત્ર કાઢવાની છૂટ આપી છે.

રાજ્યમાં ધો.9થી 12ની પ્રથમ પરીક્ષાના આયોજનને લઈને બોર્ડ દ્વારા પરિપત્ર કરવામાં આવ્યો હતો. જેમાં ધો.9થી 12ની પ્રથમ કસોટી 18 ઓક્ટોબરથી 27 ઓક્ટોબર દરમિયાન લેવામાં આવનારી છે. ઉપરાંત આ પરીક્ષા માટેના પ્રશ્નપત્રો બોર્ડ દ્વારા પુરા પાડવામાં આવનાર હોવાનું જણાવાયું હતું. આ નિર્ણય બાદ રાજ્યના ખાનગી શાળા સંચાલક મંડળ દ્વારા પ્રથમ કસોટીના પ્રશ્નપત્રો બાબતે કોવિડ-19ની વર્તમાન પરિસ્થિતિને ધ્યાને રાખીને બોર્ડના પરિપત્ર અંગે પુનઃ વિચારણા કરવા માટે રજૂઆત કરી હતી. આ મુદ્દે બોર્ડ દ્વારા સરકાર સાથે ચર્ચા વિચારણા કરી હતી.

ત્યાર બાદ કોવિડ-19ની પરિસ્થિતિમાં શૈક્ષણિક વર્ષ 2021-22માં શાળાઓમાં પ્રત્યક્ષ શિક્ષણ ધો.12 માટે 15 જુલાઈથી અને ધો.9થી 11 માટે 26 જુલાઈથી શરૂ કરવામાં આવ્યું હતું. જેમાં સરકારની ગાઈડલાઈન અનુસાર વિદ્યાર્થીઓની હાજરી 50 ટકા રાખવામાં આવી હતી. ઉપરાંત વાલીની લેખિત સંમતિ પછી જ વિદ્યાર્થીઓ સ્કૂલમાં હાજરી આપી શકે તેવી જોગવાઈ પણ કરવામાં આવી હતી. જેથી દરેક શાળાઓમાં અભ્યાસક્રમ એક સરખો ચાલ્યો ન હોય તેવી સંભાવના છે.

આ બાબતોને ધ્યાને લઈને શૈક્ષણિક વર્ષ 2021-22માં ધો.9થી 12માં પ્રથમ પરીક્ષા માટે શિક્ષણ બોર્ડ દ્વારા જે વિષયોના પ્રશ્નપત્રો શાળાઓને જિલ્લા શિક્ષણાધિકારી મારફતે મોકલવામાં આવનાર છે તે માટે શાળાઓને વિકલ્પ આપવાનું નક્કી કરાયું છે. જે શાળાઓ બોર્ડના પ્રશ્નપત્રોનો પ્રથમ પરીક્ષા માટે સ્વૈચ્છિક ધોરણે ઉપયોગ કરવા માંગતી હોય તેવી શાળાઓ આ પ્રશ્નપત્રોનો ઉપયોગ કરી શકશે.

જ્યારે જે શાળાઓ પોતાની રીતે શાળા કક્ષાએ પ્રશ્નપત્રો તૈયાર કરવા માંગતી હોય તેવી શાળાઓ શાળા કક્ષાએ પ્રશ્નપત્રો તૈયાર કરી શકે તેવી છૂટ આપવામાં આવી છે. આ માટે શિક્ષણ બોર્ડ દ્વારા પરિપત્ર કરવામાં આવ્યો છે, જેમાં પ્રથમ પરીક્ષાના આયોજન માટે શાળાઓને બોર્ડના પ્રશ્નપત્રોનો સ્વૈચ્છિક રીતે વૈકલ્પિક ધોરણે ઉપયોગ કરવા માટે તમામ શાળાઓને સુચના આપવામાં આવી છે. જેથી હવે ખાનગી શાળાઓ પોતાની રીતે પ્રશ્નપત્ર કાઢીને પણ પરીક્ષા લઈ શકશે.

 Follow Gujarat Exclusive on Telegram For Latest News From Gujarat Follow Gujarat Exclusive on WhatsApp For Latest News From Gujarat 

Follow Gujarat Exclusive on Instagram For Latest News From Gujarat  Follow Gujarat Exclusive on Twitter For Latest News From Gujarat