‘આવો મારી પાસે બેસો…’ મહિલા પત્રકાર પર ટિપ્પણી કરીને વિવાદમાં ઘેરાયા તમિલનાડુના ભાજપ પ્રમુખ

તમિલનાડુ ભાજપના વડા કે. અન્નામલાઈ સતત વિવાદોમાં રહે છે. આ વખતે તેમણે એક મહિલા રિપોર્ટર સાથે એવું વર્તન કર્યું, જેના કારણે દરેક જગ્યાએ તેની ટીકા થઈ રહી છે. વાસ્તવમાં, મહિલા પત્રકારે અન્નામલાઈને બીજેપી સંબંધિત પ્રશ્ન પૂછ્યો, જેના પર તેઓ ગુસ્સે થઈ ગયા અને મહિલા પત્રકારને ઠપકો આપ્યો. કોઈમ્બતુર પ્રેસ ક્લબ દ્વારા તેમના આ પગલાની આકરી ટીકા કરવામાં આવી છે. વિવાદ વધતાં અન્નામલાઈને સ્પષ્ટતા આપવાની ફરજ પડી હતી.

મહિલા પત્રકારે સવાલ કર્યો હતો

અહેવાલો અનુસાર, એક મહિલા પત્રકારે અન્નામલાઈને પૂછ્યું હતું કે શું તેઓ ભાજપ તમિલનાડુના અધ્યક્ષ ન હોત તો શું તેઓ પાર્ટીમાં રહ્યા હોત. આ પ્રશ્ન સાંભળીને અન્નામલાઈ ગુસ્સે થઈ ગયા અને પત્રકારને કહ્યું કે તમારે મારી પાસે આવીને બેસવું જોઈએ જેથી ટીવી પર જોનાર દરેકને  ખબર પડે કે આ પ્રશ્ન કોણે પૂછ્યો છે. તે મહિલા રિપોર્ટરને પોતાની પાસે આવીને બેસવા માટે દબાણ કરી રહ્યા હતા.

બીજેપી નેતા અન્નામલાઈએ શું કહ્યું?

તમિલનાડુના બીજેપી ચીફ અન્નામલાઈએ કહ્યું, અહીં આવો અને મારી બાજુમાં બેસો, લોકોને ટીવી પર એ જોવાનો મોકો મળવો જોઈએ કે મને આ સવાલ કોણે કર્યો ? પ્રશ્નો પૂછવાની એક રીત હોય છે. 8 કરોડ લોકોએ આવો શાનદાર સવાલ પૂછનાર વ્યક્તિને જાણવી જોઈએ ?  જ્યારે તેઓ મહિલા રિપોર્ટર પર આવું કરવા માટે સતત દબાણ કરી રહ્યા હતા ત્યારે સ્થળ પર હાજર અન્ય સાથી પત્રકારોએ પણ આ અંગે વાંધો ઉઠાવ્યો હતો.

તમિલનાડુ બીજેપી અધ્યક્ષે કહ્યું કે હું પૂર્ણ સમયનો નેતા નથી. મારી ઓળખ એક ખેડૂત તરીકેની છે. તે પછી હું એક નેતા છું અને ભાજપ સાથે જોડાયેલો છું. બાકીના પત્રકારોએ અન્નામલાઈની આ કાર્યવાહી પર નારાજગી વ્યક્ત કરી અને વિરોધ કર્યો તો અન્નામલાઈએ કહેવાનું શરૂ કર્યું કે હું તો બસ યોગ્ય રીતે પ્રશ્ન પૂછવા માટે કહી રહ્યો હતો. હું તમારી બહેનને સારા ઇરાદાથી સલાહ આપતો હતો.