ત્રણ ભારતીય ખેલાડીઓને વિઝા ન આપવાનો મામલો ગરમાયો, અનુરાગ ઠાકુરે ચીન પ્રવાસ રદ કર્યો

કેનેડા બાદ હવે ચીન અને ભારતના સંબંધો પણ ગંભીર તબક્કા તરફ આગળ વધી રહ્યા છે. એશિયન ગેમ્સમાં ભાગ લેવા માટે ત્રણ ભારતીય ખેલાડીઓ ચીનના હાંગઝોઉ જવાના હતા. પરંતુ ચીને તેમને મંજૂરી આપી ન હતી. ત્રણેય ખેલાડીઓને ચીન આવવા માટે મંજૂરી આપવામાં આવી ન હતી. હવે આ મામલો ગરમાયો છે. ભારતે ચીનને જડબાતોડ જવાબ આપ્યો છે. ચીનની આ હરકતને પગલે કેન્દ્રીય મંત્રી અનુરાગ ઠાકુરે તેમનો ચીનનો પ્રવાસ રદ કરી દીધો છે.

મામલો શું છે

મીડિયા રિપોર્ટ્સ અનુસાર, એશિયન ગેમ્સ ઓર્ગેનાઈઝિંગ કમિટીએ ખેલાડીઓને એક્રેડિટેશન કાર્ડ મોકલ્યા છે, આ કાર્ડ્સ વિઝાની જેમ જ કામ કરશે. ખેલાડીઓએ તેમના પ્રવાસ દસ્તાવેજો ડાઉનલોડ કરવાના હતા. ત્યારપછી ચીન પહોંચીને તેનું વેરિફિકેશન કરવાનું હતું. ટીમના બાકીના સભ્યોના ડોક્યુમેન્ટ્સ ડાઉનલોડ થઈ ગયા હતા. પરંતુ મૂળ અરુણાચલના ત્રણ ખેલાડીઓના દસ્તાવેજો ડાઉનલોડ થઈ શક્યા નથી. તેમના સિવાય બાકીના ખેલાડીઓ 20 સપ્ટેમ્બરે ચીન જતા રહ્યા હતા.

ત્રણેયને એક્રેડિટેશન કાર્ડ ન મળ્યું

મૂળ અરુણાચલના જે ત્રણ એથ્લેટ ચીન જઈ  ન શક્યા તેમના નામ ન્યામાન વાંગસુ, ઓનિલ તેગા અને માપુંગ લામગુ છે. આ મામલે ત્રણેય એથ્લેટ કેન્દ્રીય મંત્રી કિરણ રિજિજુને મળ્યા હતા. વુશુ એસોસિયેશન ઓફ ઈન્ડિયાના પ્રમુખ અને એશિયન ગેમ્સ માટે ભારતના ઈન્ચાર્જ ભૂપેન્દ્ર સિંહ બાજવાએ પણ ઓલિમ્પિક કાઉન્સિલ સમક્ષ આ મુદ્દો ઉઠાવ્યો હતો.

વાંગસુને ઈન્દિરા ગાંધી એરપોર્ટ પરથી પરત ફરવું પડ્યું હતું. વાંગસુને એરપોર્ટ પર એરલાઈન્સ દ્વારા કહેવાયું કે તે માત્ર હોંગકોંગ જઈ શકે છે. તેનાથી આગળ તેની પાસે વિઝા નથી. તેગા અને માપુંગને એશિયન ગેમ્સની આયોજક સમિતિ દ્વારા ઈ-માન્યતા આપવામાં આવી હતી. જ્યારે આ ખેલાડીઓએ કોમ્પ્યુટરમાંથી તેમનું એક્રેડિટેશન કાર્ડ મેળવવાનો પ્રયાસ કર્યો ત્યારે તેગા અને માપુંગના કાર્ડ આવ્યા ન હતા.

અગાઉ પણ આવું થયું હતું

આ પહેલા પણ આ વર્ષે જુલાઈ મહિનામાં ન્યામાન વાંગસુ, ઓનિલ તેગા અને માપુંગ લામગુ ચીન જઈ શક્યા ન હતા. તે ચેંગડુમાં વર્લ્ડ યુનિવર્સિટી ગેમ્સમાં ભાગ લેવા જઈ રહી હતી. આ પછી તેના વિરોધમાં વુશુ ટીમે આ ગેમ્સમાંથી પોતાનું નામ પાછું ખેંચી લીધું હતું.

વિદેશ મંત્રાલયનું નિવેદન

ભારતીય વિદેશ મંત્રાલયના પ્રવક્તા અરિંદમ બાગચીએ કહ્યું છે કે ભારતના રમતગમત મંત્રી અનુરાગ ઠાકુર એશિયન ગેમ્સ માટે ચીન જવાના હતા, પરંતુ હવે તે પ્રવાસ રદ કરી દેવામાં આવ્યો છે. એશિયન ગેમ્સનો સત્તાવાર પ્રારંભ આવતીકાલે 23 સપ્ટેમ્બરે થવાનો છે. અરિંદમ બાગચીએ કહ્યું કે ભારત સરકારને જાણવા મળ્યું છે કે ચીની સત્તાવાળાઓએ, લક્ષિત અને પૂર્વયોજિત રીતે, અરુણાચલ પ્રદેશના કેટલાંક ભારતીય એથ્લેટ્સ સાથે ભેદભાવ કર્યો છે અને તેમને ચીનના હાંગઝોઉમાં યોજાનારી 19મી એશિયન ગેમ્સમાં માન્યતા અને પ્રવેશનો ઇનકાર કર્યો છે.