હવે ભારતના સમર્થનમાં આવ્યું શ્રીલંકા, કહ્યું- કેનેડા આતંકવાદીઓનું સુરક્ષિત આશ્રય બની ગયું છે

ભારત પર પાયાવિહોણા આરોપો લગાવીને કેનેડા મુશ્કેલીમાં મુકાઈ ગયું છે, ઘણાં દેશો કેનેડાના આ નિર્ણયની સતત ટીકા કરી રહ્યા છે. અમેરિકા અને ઓસ્ટ્રેલિયા જેવા દેશોના સમર્થન બાદ હવે પાડોશી દેશ શ્રીલંકાએ પણ ભારતને સમર્થન આપ્યું છે. કેનેડા અને ભારત વચ્ચે ચાલી રહેલા વિવાદ વચ્ચે શ્રીલંકાના વિદેશ મંત્રીએ કહ્યું કે કેનેડામાં કેટલાંક આતંકવાદીઓને સુરક્ષિત આશ્રય મળ્યો છે.

કેનેડાના વડા પ્રધાન પુરાવા વિના આવા આક્ષેપો કરે છેઃ અલી સાબરી

ભારત-કેનેડા વિવાદ પર મીડિયા સાથે વાત કરતા શ્રીલંકાના વિદેશ મંત્રી અલી સાબરીએ કહ્યું કે કેટલાંક આતંકવાદીઓને કેનેડામાં સુરક્ષિત આશ્રય મળ્યો છે. આ રીતે કેનેડાના વડા પ્રધાન પાસે કોઈ પુરાવા વિના કેટલાંક અપમાનજનક આરોપો લગાવવાની આ જ રીત છે. આ જ વાત તેમણે શ્રીલંકા માટે પણ કરી હતી. એમ કહેવું કે શ્રીલંકામાં નરસંહાર થયો હતો, એક ભયાનક, તદ્દન જૂઠાણું હતું. બધાં જાણે છે કે અમારા દેશમાં કોઈ નરસંહાર થયો ન હતો. સાબરીએ વધુમાં કહ્યું કે મેં ગઈકાલે જોયું કે કેવી રીતે કેનેડિયન પીએમ નાઝીઓ સાથે સંકળાયેલી કોઈક વ્યક્તિનું ઉષ્માપૂર્વક સ્વાગત કરી રહ્યા હતા, આ શંકાસ્પદ છે.

અમે ભારતનું સમર્થન કરીએ છીએ: શ્રીલંકા

ભારત પર કેનેડાના આરોપો વિશે જ્યારે પૂછવામાં આવ્યું ત્યારે શ્રીલંકાના વિદેશ મંત્રી અલી સાબરીએ કહ્યું કે મને લાગે છે કે ભારતની પ્રતિક્રિયા ખૂબ જ કડક હતી. આ સિવાય તેમણે કહ્યું કે અમે ભારતને સમર્થન આપીએ છીએ. મારા જીવનના 40 વર્ષ શ્રીલંકામાં વિવિધ પ્રકારના આતંકવાદનો સામનો કરવામાં વિત્યા છે. મેં આતંકવાદને કારણે ઘણાં મિત્રો અને સાથીઓને ગુમાવ્યા છે.

કેનેડાના વડા પ્રધાને આરોપોનો પુનરોચ્ચાર કર્યો

આ અગાઉ ન્યૂયોર્કમાં સંયુક્ત રાષ્ટ્ર મહાસભાની બેઠકમાં કેનેડાના પીએમ જસ્ટિન ટ્રુડોએ કહ્યું કે હું ભારત સરકારને અમારી સાથે મળીને કામ કરવા, આ આરોપોને ગંભીરતાથી લેવા અને ન્યાય થવા દેવાનું આહ્વાન કરું છું. આ ઉપરાંત, તેમણે કહ્યું કે કાયદાના શાસનવાળા દેશમાંઆવી પ્રક્રિયાઓ સખત અને સ્વતંત્ર રીતે થાય તે સુનિશ્ચિત કરવાની અમારી જવાબદારી છે અને અમે તે જ કરી રહ્યા છીએ. અમે આંતરરાષ્ટ્રીય આધાર પરની સિસ્ટમ માટે ઊભા છીએ. આ સાથે જ પોતાના દાવાનો પુનરોચ્ચાર કરતાં તેમણે કહ્યું હતું કે મેં સોમવારે કહ્યું હતું તેમ ભારત સરકારના એજન્ટો કેનેડાની ધરતી પર એક કેનેડિયન નાગરિકની હત્યામાં સામેલ હતા તેમ માનવા માટે વિશ્વસનીય કારણ છે. અમે ભારત સરકારને આ મામલાની હકીકત જાણવા માટે આગળ વધીને અમારી સાથે કામ કરવા માટે અનુરોધ કરીએ છીએ.