ગાંધી જયંતિ: પ્રધાનમંત્રી મોદી સહિત નેતાઓએ બાપુને શ્રદ્ધાંજલિ આપી, તેમના સિદ્ધાંતોને યાદ કર્યા

દિલ્હીઃ સમગ્ર દેશ આજે રાષ્ટ્રપિતા મહાત્મા ગાંધીની 154મી જન્મજયંતિની ઉજવણી કરી રહ્યો છે. આ અવસરે વડાપ્રધાન નરેન્દ્ર મોદી સવારે 7:30 વાગ્યે દિલ્હીના રાજઘાટ પહોંચ્યા અને બાપુને પુષ્પ અર્પણ કરીને શ્રદ્ધાંજલિ આપી. તેમના ઉપરાંત રાષ્ટ્રપતિ દ્રૌપદી મુર્મુ, કોંગ્રેસ અધ્યક્ષ મલ્લિકાર્જુન ખડગે અને લોકસભા અધ્યક્ષ ઓમ બિરલા સહિત અનેક નેતાઓએ પણ રાજઘાટ પહોંચીને બાપુને શ્રદ્ધાંજલિ આપી હતી.આ પ્રસંગે પૂર્વ વડાપ્રધાન લાલ બહાદુર શાસ્ત્રીને પણ તેમની જન્મજયંતિ પર યાદ કરવામાં આવ્યા હતા.

ગાંધીજીના ઉપદેશો આપણા માર્ગને પ્રકાશિત કરે છે – પી એમ મોદી

આ પહેલા ગાંધી જયંતિના અવસર પર વડાપ્રધાન મોદીએ સોશિયલ મીડિયા પ્લેટફોર્મ X પર ગાંધીને યાદ કર્યા હતા. તેમણે લખ્યું હતું કે, ‘હું ગાંધીજીને નમન કરું છું. તેમના ઉપદેશો આપણા માર્ગને પ્રકાશિત કરતા રહે છે. તેમનો પ્રભાવ વૈશ્વિક છે, જે સમગ્ર માનવ જાતિને એકતા અને કરુણાની ભાવનાને અનુસરવા માટે પ્રેરણા આપે છે. આપણે હંમેશા તેમના સપના પૂરા કરવા માટે કામ કરતા રહીએ.’ વડાપ્રધાન મોદીએ આગળ લખ્યું, ‘ગાંધીજીના વિચારો દરેક યુવાનોને તેમણે જે પરિવર્તનનું સપનું જોયું હતું તેના વાહક બનવા સક્ષમ બનાવે છે, જેનાથી દરેક જગ્યાએ એકતા અને સંવાદિતાને પ્રોત્સાહન મળે છે.’

રાષ્ટ્રપતિ મુર્મુઃ ગાંધીજીના વિચારો આજે પણ પ્રાસંગિક

રાષ્ટ્રપતિ દ્રૌપદી મુર્મુએ પણ એક લેખ દ્વારા ગાંધી જયંતિએ રાષ્ટ્રપિતાને શ્રદ્ધાંજલિ આપી છે. તેમણે લખ્યું કે, ‘ગાંધીજીના વિચારો માત્ર ચર્ચા ન હતા, પરંતુ તેમના સતત અભ્યાસનું પરિણામ હતા. ગાંધીજીના મતે જે ફિલસૂફી જીવન માટે ઉપયોગી નથી તે ‘ધૂળની જેમ નિર્જીવ’ છે. તેમના શબ્દો, કાર્યો અને વિચારોમાં પૂર્ણ એકતા હતી. તેથી જ તેમના શબ્દો આજે પણ આપણા બધા માટે સુસંગત છે.’

ગાંધીજીની વિચારધારા આપણા મહાન રાષ્ટ્રનો નૈતિક પાયો  – ખડગે

કોંગ્રેસ અધ્યક્ષ મલ્લિકાર્જુન ખડગે પણ ગાંધી જયંતિના અવસર પર રાજઘાટ પહોંચ્યા અને તેમને શ્રદ્ધાંજલિ આપી. બાપુને યાદ કરતા તેમણે સોશિયલ મીડિયા પ્લેટફોર્મ એક્સ પર લખ્યું કે ગાંધીજી માત્ર એક વ્યક્તિ ન હતા, તેઓ એક વિચાર, એક વિચારધારા અને આપણા મહાન રાષ્ટ્રના નૈતિક આધાર છે. સત્ય, અહિંસા, સ્વતંત્રતા, સમાનતા અને સહઅસ્તિત્વના તેમના આદર્શો શાશ્વત મૂલ્ય છે. આપણે બાપુના આદર્શોને તેમની જન્મજયંતિ પર શ્રદ્ધાંજલિ અર્પણ કરીએ છીએ.

કોંગ્રેસ નેતા રાહુલ ગાંધીએ પણ બાપૂને યાદ કર્યા

કોંગ્રેસ નેતા રાહુલ ગાંધીએ પણ બાપૂને યાદ કરતા સોશિયલ મીડિયા પ્લેટફોર્મ એક્સ પર ટ્વિટ કર્યું હતું. કોંગ્રેસ નેતા રાહુલ ગાંધીએ લખ્યું કે મહાત્મા ગાંધીએ જ સત્ય, અહિંસા અને સૌહાર્દનો માર્ગ તથા ભારતને જોડવાનો માર્ગ બતાવ્યો હતો. બાપૂને તેમની જયંતી પર શત શત નમન.

सत्य, अहिंसा और सौहार्द का रास्ता, भारत को जोड़ने का रास्ता महात्मा गांधी ने ही दिखाया था। बापू को उनकी जयंती पर शत शत नमन। pic.twitter.com/8mNGpSYcP6

— Rahul Gandhi (@RahulGandhi) October 2, 2023