જમ્મુ-કાશ્મીરના રાજૌરીમાં અથડામણ, સુરક્ષા દળોએ એક આતંકવાદીને ઠાર માર્યો

જમ્મુના રાજૌરી જિલ્લાના દસલ વિસ્તારમાં અથડામણ થઈ છે, જેમાં સુરક્ષા દળોએ એક આતંકવાદીને ઠાર માર્યો છે. શુક્રવારની વહેલી સવારે ઓપરેશન શરૂ થયું હતું. આ સાથે બેથી ત્રણ આતંકીઓને ઘેરી લેવામાં આવ્યા હોવાના સમાચાર છે. આ અગાઉ મે મહિનામાં પણ સુરક્ષાદળોની આતંકીઓ સાથે અથડામણ થઈ હતી, જેમાં સેનાના પાંચ જવાન શહીદ થયા હતા. સુરક્ષા દળોને શુક્રવારે સવારે માહિતી મળી હતી કે રાજૌરીના દસલ વિસ્તારમાં આતંકવાદીઓ છુપાયા છે, ત્યારબાદ સર્ચ ઓપરેશન હાથ ધરવામાં આવ્યું હતું.

સર્ચ ઓપરેશન દરમિયાન જ્યારે આતંકીઓએ સુરક્ષા દળોને આવતા જોયા તો તેમણે જવાનો પર ફાયરિંગ શરૂ કરી દીધું. સુરક્ષા દળોએ પણ જવાબી કાર્યવાહી કરી અને આતંકીઓ પર ગોળીબાર કર્યો, જેમાં એક આતંકી માર્યો ગયો હોવાના અહેવાલ છે. આ સાથે સુરક્ષા દળોએ તે વિસ્તારને સીલ કરી દીધો છે. પ્રાપ્ત માહિતી અનુસાર સુરક્ષાદળોએ બેથી ત્રણ આતંકીઓને ઘેરી લીધા છે.

અમરનાથ યાત્રા માટે કડક સુરક્ષા વ્યવસ્થા

આ વર્ષે અમરનાથ યાત્રા માટે જમ્મુ-કાશ્મીરમાં કડક સુરક્ષા વ્યવસ્થા કરવામાં આવી છે. આ અંગે જમ્મુ-કાશ્મીરના ડીજીપી દિલબાગ સિંહે ગુરુવારે શ્રીનગરમાં પોલીસ અધિકારીઓ સાથે સમીક્ષા બેઠક યોજી હતી અને સુરક્ષા વ્યવસ્થાની સમીક્ષા કરી હતી.

આ અગાઉ મે મહિનાની શરૂઆતમાં પણ રાજૌરી વિસ્તારમાં આતંકી હુમલામાં પાંચ જવાન શહીદ થયા હતા. આ સાથે જ બે આતંકવાદીઓ માર્યા ગયા હતા. આ હુમલા બાદ રાજૌરી વિસ્તારમાં ઈન્ટરનેટ સેવા બંધ કરી દેવામાં આવી હતી. ગયા મહિને SCOની બેઠક માટે ઘણા દેશોના વિદેશ મંત્રીઓ ભારતમાં હાજર હતા તેવા સમયે રાજૌરીમાં હુમલો થયો હતો. તેથી તેને પાકિસ્તાનના મોટા ષડયંત્ર તરીકે પણ જોવામાં આવી રહ્યું હતું.