Gujarat Exclusive > ગુજરાત > મધ્ય ગુજરાત > ઈન્ટેલિજન્સ રિપોર્ટ: લોકડાઉનમાં વધારો થશે તો લોકોની હાલત થશે કફોડી

ઈન્ટેલિજન્સ રિપોર્ટ: લોકડાઉનમાં વધારો થશે તો લોકોની હાલત થશે કફોડી

0
2171

રાજયમાં કોરોના વાયરસનો કહેર હવે ઝડપી વધતા સરકારની ચિંતામાં પણ વધારો જોવા મળી રહ્યો છે. ત્યારે 14મી એપ્રિલે પૂર્ણ થઈ રહેલા લોકડાઉનને વધારવામાં ના આવ્યું તો કોરોના વાયરસના આંકડામાં વધારે ઉછાળો આવી શકે છે, પણ બીજી તરફ લોકડાઉનના કારણે ગરીબ અને મજૂર વર્ગની સ્થિતિ ગંભીર બની ગઈ છે. સુરતમાં પ્રવાસી મજૂરોએ પોતાના રાજ્ય ઓડિશામાં જવા માટે આક્રમક સ્વરુપ ધારણ કર્યું હતું. જેની સામે રાજ્યની ઈન્ટેલિજન્સ એજન્સીએ ચિંતા વ્યક્ત કરી છે. આ અંગેનો રિપોર્ટ સરકારને પણ સોંપવામાં આવ્યો છે.

સુરતમાં પોલીસે કાર્યવાહી કરીને 80 પ્રવાસી મજૂરોની અટકાયત કરી હતી, જેમાંથી મોટાભાગના ઓડિશાના હતા. તેમણે શુક્રવારે રાત્રે કથિત રીતે શાકભાજી મૂકવાના ખોખા સળગાવ્યા, રોડ જામ કર્યો અને પોલીસ પર પથ્થરમારો પણ કર્યો હતો.

રાજ્યના ઈન્ટલિજન્સ બ્યુરોના અધિકારીઓએ સરકારનું ધ્યાન દોર્યું હતું કે લોકડાઉન 14મી પછી લંબાવવામાં આવ્યું તો પ્રવાસી મજૂરોની રાજ્યમાં સ્થિતિ વધારે ખરાબ થઈ શકે છે. આ અંગેનો પત્ર ગૃહવિભાગના એડિશનલ સેક્રેટરીથી લઈને રાજ્યના કલેક્ટર, પોલીસ અધિકારીઓ અને અન્ય ઉચ્ચ પોલીસકર્મીઓને મોકલવામાં આવ્યો છે. ઈટલિજન્સ એજન્સીઓએ વિગતો મેળવીને આ પત્ર પત્ર ગુરુવારે મોકલવામાં આવ્યો હતો. જેમાં લોકડાઉનના કારણે શહેરમાં અટવાઈ ગયેલા ગયેલા પ્રવાસી મજૂરોની સ્થિતિ વર્ણવવામાં આવી હતી.

રાજ્યમાં 8,800 કરતા વધુ મજૂરો હાલમાં 230 જેટલા સેલ્ટર હોમમાં આશરો લઈ રહ્યા છે. શ્રમ અને રોજગારના એડિશનલ સેક્રેટરી વિપુલ મિશ્રાએ જણાવ્યું કે, “રાજ્યના 230 સેલ્ટર હોમમાં તમામ પ્રકારની સુવિધાઓ પૂરી પાડવામાં આવી રહી છે. તેમના સ્વાસ્થ્ય, સફાઈ, ભોજન અને શૌચાલયની સુવિધા તે સ્થળ પર જ મળી રહે તેવી વ્યવસ્થા કરાઈ છે. આ સાથે સોશિયલ ડિસ્ટન્સિંગનું પણ ધ્યાન રાખવામાં આવી રહ્યું છે. આ સ્થળ પર એમ્બ્યુલન્સ મોકલીને તેમની તપાસ પણ કરવામાં આવે છે. આ તમામ મજૂરોનો કોરોના ટેસ્ટ પણ કરવામાં આવ્યો છે.”

શું કહે છે ઈન્ટેલિજન્સનો રિપોર્ટ

ઈન્ટેલિજન્સે સરકારને સોંપેલા રિપોર્ટમાં ચિંતા વ્યક્ત કરી છે. કેટલાક સેલ્ટર હોમ્સમાં સોશિયલ ડિસ્ટન્સિંગની સમસ્યા ઉભી થઈ રહી છે. કેટલીક જરુરી સુવિધાઓ અને શૌચાલય જેવા મુદ્દે લોકો તંત્ર સામે આક્રોશ વ્યક્ત કરી રહ્યા છે. અહીં રહેતા મોટા ભાગના મજૂરો એક થઈને પોતાના રાજ્યમાં પરત જવા માટેની માંગ કરી રહ્યા છે. આ તમામ સ્થિતિ પર નજર રાખનાર ઈન્ટેલિજન્સ એજન્સીએ લોકડાઉન લંબાવવામાં આવ્યું અને તેમને પોતાના રાજ્યમાં પરત જવા ના મળ્યું તો સામાજિક ઘર્ષણ ઉભું થવાની ચિંતા પણ વ્યક્ત કરી છે.

શેલ્ટર હોમમાં અલગ-અલગ રાજ્ય અને સમાજના લોકો એક સાથે રહી રહ્યા છે. ગૃહ વિભાગને લખેલા પત્રમાં મહિલા અને બાળકોની સુરક્ષા અંગે પણ સવાલ ઉઠાવવામાં આવ્યો છે. અન્ય રાજ્યોમાંથી ગુજરાતમાં આવેલા મજૂરો મહેસાણા, પાટણ, દાહેદ, અરવલ્લી, ખેડા, જૂનાગઢ, વડોદરા, ગાંધીનગર અને બનાસકાંઠામાં છે, જેઓ પોતાના રાજ્યમાં પરત જવાની માગણી કરી રહ્યા છે.

આ બધાની વચ્ચે સૂત્રો જણાવી રહ્યા છે કે, રાજ્ય સરકાર પ્રવાસી મજૂરોને તેમના ઘરે પહોંચાડવાની વ્યવસ્થા અંગે વિચારી રહી છે. સોશિયલ ડિસ્ટન્સિંગ જળવાઈ રહે તે રીતે કેન્દ્રની મંજૂરી મળ્યા પછી કોઈ નિર્ણય લેવામાં આવી શકે છે.

લોકડાઉનમાં વાળ સેટ કરાવનારાઓનું પોલીસે નિકાળ્યું ફુલેકુ