Gujarat Exclusive > ગુજરાત > મધ્ય ગુજરાત > ધો. 9થી 12ની પ્રથમ કસોટીનો કાર્યક્રમ જાહેર કરાયો

ધો. 9થી 12ની પ્રથમ કસોટીનો કાર્યક્રમ જાહેર કરાયો

0
77
  • એકસાથે 18 થી 27 ઓક્ટોબર દરમિયાન પરીક્ષા લેવામાં આવશે

  • ધો. 9, 11,12 સામાન્યપ્રવાહમાં 20 ગુણ હેતુલક્ષીપ્રશ્નો તથા 80 ગુણના વર્ણનાત્મક પ્રશ્નો હશે

ગાંધીનગર: ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા ધોરણ-9થી 12ની પ્રથમ કસોટીનો કાર્યક્રમ જાહેર કરવામાં આવ્યો છે. રાજ્યમાં ધોરણ-9થી 12ની પ્રથમ કસોટી એક સાથે 18 ઓક્ટોબરથી 27 ઓક્ટોબર દરમિયાન લેવામાં આવશે. આ કસોટી માટેના પ્રશ્નપત્રો બોર્ડ દ્વારા આપવામાં આવશે. શાળાઓએ ફરજિયાત બોર્ડ દ્વારા આપવામાં આવેલા પ્રશ્નપત્ર અને સમય પત્રક મુજબ જ પરીક્ષા લેવાની રહેશે. પરીક્ષા માટે જૂનથી સપ્ટેમ્બર સુધીનો અભ્યાસક્રમ ધ્યાને લેવાનો રહેશે. પ્રથમ કસોટીમાં ધોરણ-9થી 11 અને 12 સામાન્ય પ્રવાહમાં 20 ગુણના હેતુલક્ષી પ્રશ્નો અને 80 ગુણના વર્ણનાત્મક પ્રશ્નો હશે. જ્યારે ધોરણ-12 સાયન્સમાં 50 ગુણના MCQ અને 50 ગુણના વર્ણનાત્મક પ્રશ્નો હશે.

બોર્ડ દ્વારા ધોરણ-9 અને 10માં ગુજરાતી, ગણિત, વિજ્ઞાન અને સામાજિક વિજ્ઞાન, ધોરણ-11 અને 12 સાયન્સમાં અંગ્રેજી, કેમેસ્ટ્રી, બાયોલોજી, ફિઝીક્સ અને ગણિત તેમજ સામાન્ય પ્રવાહમાં અંગ્રેજી, નામાના મુળતત્વો, વાણિજ્ય વ્યવસ્થા, મનોવિજ્ઞાન, અર્થશાસ્ત્ર અને આંકડાશાસ્ત્ર વિષયોની પરીક્ષાના પ્રશ્નપત્રો અને સમયપત્રક બોર્ડ દ્વારા તૈયાર કરવામાં આવશે. આ સિવાયના વિષયોના પેપર શાળાએ તૈયાર કરવાના રહેશે. સમગ્ર રાજ્યમાં એક સાથે પરીક્ષા લેવાય તે માટે બોર્ડ દ્વારા પરીક્ષાનો કાર્યક્રમ જાહેર કર્યો છે.

પ્રથમ કસોટીને લઈને જિલ્લા શિક્ષણાધિકારી કચેરીના એક અધિકારીને નોડલ અધિકારી તરીકે નિમણુંક કરવાની રહેશે. નોડલ અધિકારીએ એક ગોપનીય ઈ-મેઈલ આઈડી બનાવવાનો રહેશે. નોડલ ઓફિસરના વિષયોના ગુજરાતી, હિન્દી અને અંગ્રેજી ભાષામાં પ્રશ્નપત્રોની સીલબંધ કોપી પરીક્ષાના 12 દિવસ પહેલા એટલે કે 5 ઓક્ટોબરના રોજ રૂબરૂમાં આપવામાં આવશે. આ માટે નોડલ અધિકારીઓની મીટીંગ અને પ્રશ્નપત્ર સ્વિકારવા માટે 5 ઓક્ટોબરે બોર્ડની કચેરીએ હાજર રહેવું પડશે.

બોર્ડ દ્વારા તૈયાર કરવામાં આવનારા પ્રશ્નપત્રનો જ પરીક્ષામાં ઉપયોગ કરવાનો રહેશે. અન્ય પ્રશ્નપત્રનો ઉપયોગ કરી શકાશે નહીં. ઉપરાંત સમય પત્રકમાં પણ ફેરફાર કરી શકાશે નહીં. પ્રથમ કસોટીના પ્રશ્નપત્રો જૂનથી સપ્ટેમ્બર માસ સુધીના અભ્યાસક્રમને અનુલક્ષીને તૈયાર કરવામાં આવશે. આ વખતે ઘટાડેલા અભ્યાસક્રમને ધ્યાને લેવાનો રહેશે નહીં. ધોરણ-9થી 11 અને ધોરણ-12 સામાન્ય પ્રવાહ માટે 20 ટકા હેતુલક્ષી પ્રશ્નો અને 80 ટકા વર્ણનાત્મક પ્રશ્નો રહેશે. જ્યારે ધોરણ-12 સાયન્સ માટે 50 ટકા MCQ અને 50 ટકા વર્ણનાત્મક પ્રશ્નો રહેશે.

ધોરણ-9 અને ધોરણ-11ના પ્રશ્નપત્ર 50 ગુણના અને 2 કલાકના હશે. જ્યારે ધોરણ-10ના પ્રશ્નપત્ર 80 ગુણ અને 3 કલાકના જ્યારે ધોરણ-12ના પ્રશ્નપત્ર 100 ગુણ અને 3 કલાકના રહેશે. પ્રશ્નપત્ર જિલ્લા શિક્ષણાધિકારીએ છપાવીને શાળાએ મોકલવાના રહેશે અને તેનો ખર્ચ સ્કૂલો પાસેથી વસુલવાનો રહેશે.

 Follow Gujarat Exclusive on Telegram For Latest News From Gujarat Follow Gujarat Exclusive on WhatsApp For Latest News From Gujarat 

Follow Gujarat Exclusive on Instagram For Latest News From Gujarat  Follow Gujarat Exclusive on Twitter For Latest News From Gujarat