Gujarat Exclusive > ગુજરાત > મધ્ય ગુજરાત > રાજયના આર્થિક વિકાસ અને રોજગારી માટે GCCIએ શું કરી સરકારમાં રજૂઆત ?

રાજયના આર્થિક વિકાસ અને રોજગારી માટે GCCIએ શું કરી સરકારમાં રજૂઆત ?

0
23
  • ગુજરાત વેપારી મહામંડળે રાજયના ગૃહ મંત્રી પ્રદિપસિંહને લખ્યો પત્ર

  • કરફયુમાં આઇ કાર્ડ જોઇને કામદારોને નોકરીમાં અવરજવરની છૂટ આપવા માંગ

ગાંધીનગર: ગુજરાતમાં કોરોનાની મહામારીને નિયંત્રણમાં લેવા માટે સરકાર તરફથી રાજયના 20 શહેરોમાં કરફયુ લાદવામાં આવ્યો છે. તેને આવકારતાં ગુજરાત ચેમ્બર ઓફ કોમર્સ એન્ડ ઇન્ડસ્ટ્રી ( ગુજરાત વેપારી મહામંડળ )એ ગુજરાતના રાજયકક્ષાના ગૃહ મંત્રી પ્રદિપસિંહ જાડેજાને પત્ર લખ્યો છે. જેમાં જણાવ્યું છે કે, રાજયના આર્થિક વિકાસમાં કોઇ વિલંબ ના આવે તથા રોજગારીના પ્રશ્નોના સર્જાય તે માટે કામદારોને આઇ.ડી. કાર્ડ જોઇને કરફયૂના સમયમાં અવરજવરની છૂટ આપવામાં આવે તેવી આશા વ્યક્ત કરી છે.

ગુજરાત ચેમ્બર ઓફ કોમર્સ એન્ડ ઇન્ડસ્ટ્રીના પ્રમુખ નટુભાઇ પટેલે ગુજરાતના રાજયકક્ષાના ગૃહ મંત્રી પ્રદિપસિંહ જાડેજાને ઉદ્દેશીને લખેલા પત્રમાં જણાવ્યું છે કે, હાલમાં સરકાર દ્વારા ગુજરાતના 20 શહેરોમાં લાદવામાં આવેલા રાત્રિ કરફયુના નિર્દેશો ખૂબ જ અનિવાર્ય છે. તથા વર્તમાન પરિસ્થિતિને ખૂબ જ જરૂરી પણ છે. પરિસ્થિતિ વણસે તે પહેલાં ગુજરાતની સાથે સાથે સમગ્ર દેશમાં કોરોના સંક્રમણ અટકાવવું ખુબ જ જરૂરી પણ છે.

તેમણે વધુમાં રાત્રિ કરફયૂના નિર્ણયને આવકારવાની સાથોસાથ વિનંતી કરતાં જણાવ્યું છે કે, સતત પ્રક્રિયાવાળા ઔદ્યોગિક એકમોમાં 24 કલાક કામદારોની જરૂર રહેતી હોય છે. આવા ઉદ્યોગ વેપારથી ઘરે અવરજવર કરતાં કામદારો, મજૂરો તથા કર્મચારીઓ માટે પોલીસ વિભાગ તેમના કંપની આઇ-ડી જોઇને કરફયુના સમયમાં અવરજવરની છૂટ આપવામાં આવે તો પોતાની શિફ્ટ ડયૂટીમાં કામ કરી શકે.

તેમણે છેલ્લે જણાવ્યું છે કે, રાજયના આર્થિક વિકાસમાં કોઇ વિલંબ ના આવે તથા રોજગારીના પ્રશ્નો ના સર્જાય તેને ધ્યાનમાં રાખીને તમારા વિભાગ દ્વારા ઉપરોક્ત સૂચનો જારી કરવામાં આવે તેવી આશા વ્યક્ત કરી છે.

અત્રે ઉલ્લેખનીય છે કે, હાલમાં ગુજરાતમાં કોરોનાના કેસોએ માઝા મૂકી છે. આ કેસોના કારણે લોકોમાં લોકડાઉન થવાનો ડર ઊભો થયો છે. જો કે ગુજરાતના મુખ્યમંત્રી વિજય રૂપાણી તથા નાયબ મુખ્યમંત્રી નીતિન પટેલ તરફથી આ બાબતે અવારનવાર સ્પષ્ટતાં કરવામાં આવી છે. છતાં દક્ષિણ ગુજરાતમાંથી કેટલાંક પરપ્રાંતિય કામદારો પોતાના ઘરની વાટ પકડી છે. જો કે તેમાં કેટલાંક લોકોએ લગ્નપ્રસંગે ઘરે જતાં હોવાનું પણ મીડિયાને જણાવ્યું હતું.

 Follow Gujarat Exclusive on Telegram For Latest News From Gujarat Follow Gujarat Exclusive on WhatsApp For Latest News From Gujarat 

Follow Gujarat Exclusive on Instagram For Latest News From Gujarat  Follow Gujarat Exclusive on Twitter For Latest News From Gujarat