BTPના સંરક્ષક છોટુભાઈ વસાવા ચૂંટણી નહિ લડે, પુત્ર મહેશ વસાવા પિતાની બેઠક પરથી લડશે ચૂંટણી

વિશાલ મિસ્ત્રી, રાજપીપળા: ગુજરાત વિધાનસભા 2022ની ચુંટણી માટે BTP એ ઉમેદવારોની બીજી યાદી બહાર પાડી છે. જેમા ઝઘડિયા બેઠક પર છોટુભાઈ વસાવાની જગ્યાએ એમના પુત્ર અને ડેડીયાપાડાના ધારાસભ્ય મહેશભાઇ વસાવાનું નામ જાહેર થતાં છોટુભાઈ વસાવા વિધાનસભા ચૂંટણી નહિ લડે એ નક્કી થઇ ગયું છે.જો કે જ્યારે BTP માંથી ચૈતરભાઈ વસાવા રાજીનામું આપી આમ આદમી પાર્ટીમાં જોડાયા, એમને આદ આદમી પાર્ટીએ ઉમેદવાર જાહેર કર્યા પછી જંગી રેલી સ્વરૂપે શકિત પ્રદર્શન કર્યું ત્યારે જ ચર્ચાઓ થઈ રહી હતી કે આ વખતે મહેશભાઈ વસાવા ડેડિયાપાડા બેઠક બદલશે.

ડેડીયાપાડામાં દિલ્હીના મુખ્યમંત્રી અરવિંદ કેજરીવાલ અને દિલ્હીના મુખ્યમંત્રી ભગવત માનની ઉપસ્થિતિમાં જંગી જાહેરસભા યોજાઇ ત્યારે ચૈત્રરભાઈ વસાવાએ એવી આગાહી કરી હતી કે આ વખતે મહેશભાઇ વસાવા ડેડીયાપાડાનું મેદાન છોડી દેશે, હવે જ્યારે BTP એ પોતાનું બીજું લીસ્ટ જાહેર કર્યું ત્યારે ચૈતરભાઈ વસાવાની એ આગાહી સાચી પડી છે.ડેડીયાપાડા બેઠક પર નર્મદા જિલ્લા BTP પ્રમુખ બહાદુર વસાવાને BTP એ ઉમેદવાર બનાવ્યા છે.

આ પણ વાંચો: તાલાળાના ધારાસભ્ય જશા બારડ ભાજપમાં, કહ્યુ- અમે અસલી કોંગ્રેસી નથી

છોટુભાઈ વસાવા સતત 7 ટર્મથી ઝઘડિયા બેઠક પરથી ધારાસભ્ય પદે ચૂંટાતા આવ્યા છે.જ્યારે મહેશભાઈ વસાવા 2002 અને 2017 માં ડેડીયાપાડાની બેઠક પર જીત્યા હતા.2017 ની ચુંટણી મહેશભાઇ વસાવા કોંગ્રેસના ગઠબંધનને કારણે જીત્યા હતા અને એમાં સિંહ ફાળો ચૈતરભાઈ વસાવાનો પણ માનવામાં આવી રહ્યો છે.આ વખતે ચૈતરભાઈ પણ સાથે નથી કે કોંગ્રેસ સાથે ગઠબંધન પણ થયું નથી એટલે મહેશભાઈ વસાવાએ પોતાની બેઠક બદલી હોવી જોઈએ.અત્રે એ ઉલ્લેખનીય છે કે છોટુભાઈ વસાવા સતત 7 ટર્મથી ઝઘડિયા બેઠક પરથી ચૂંટણી જીતતા આવ્યા છે જ્યારે મહેશભાઈ વસાવા 2002 અને 2017 માં ડેડીયાપાડા બેઠક જીત્યા હતા.