ભાજપા અધ્યક્ષ જે પી નડ્ડાએ સાધ્યું નિશાન, કહ્યું- દેશવિરોધી ટૂલકિટનો હિસ્સો બની ગયા છે રાહુલ ગાંધી

નવી દિલ્હીઃ કેમ્બ્રીજ યુનિવર્સિટીમાં રાહુલ ગાંધીના નિવેદન બાદ સતત રાજકીય નિવેદનબાજી ચાલી રહી છે. સંસદમાં તેમના અવાજને દબાવવાના નિવેદનને લઈને ભાજપા નેતા સતત લોકસભા અને રાજ્યસભામાં હોબાળો કરી રહ્યા છે. એટલું જ નહીં રાહુલ માફી માગે તે વાત પર જ ભાજપા જીદે ચડી છે. દરમિયાન, હવે ભાજપા અધ્યક્ષ જે પી નડ્ડાએ પણ રાહુલ ગાંધી પર નિશાન સાધતા કહ્યું કે પાકિસ્તાન અને કોંગ્રેસની ભાષા એક જ છે.

ભાજપા અધ્યક્ષે કહ્યું, ‘દેશવિરોધી પ્રવૃત્તિઓમાં સંડોવાયેલી છે કોંગ્રેસ’

વિદેશમાં રાહુલ ગાંધીના નિવેદન અંગે ભાજપાના રાષ્ટ્રીય અધ્યક્ષ જે પી નડ્ડાએ કહ્યું, ‘કમનસીબે કોંગ્રેસ પાર્ટી દેશવિરોધી પ્રવૃત્તિઓમાં સંડોવાઈ ગઈ છે. જનતા દ્વારા વારંવાર નકારી કાઢવામાં આવી હોવા છતાં હવે રાહુલ ગાંધી દેશવિરોધી ટૂલકિટનો કાયમી હિસ્સો બની ગયા છે. એક બાજુ પ્રધાનમંત્રી નરેન્દ્ર મોદીના નેતૃત્વમાં હાલ ભારત દુનિયાનું પાંચમું સૌથી મોટું અર્થતંત્ર બની રહ્યું છે અને જે સમયે જી20ની બેઠકો યોજાઈ રહી છે, રાહુલ ગાંધી વિદેશી ભૂમિ પર દેશ અને સંસદનું અપમાન કરી રહ્યા છે. હું રાહુલ ગાંધીને પૂછવા માંગુ છું કે આ બધાની પાછળ તેમનો ઈરાદો શું છે ?

પાકિસ્તાન અને કોંગ્રેસની એક જ ભાષાઃ જે પી નડ્ડા

રાહુલ ગાંધી માફી માગે તેવી જીદ પર ભાજપા અડી ગઈ છે. આજે ભાજપા અધ્યક્ષ જે પી નડ્ડાએ પત્રકાર પરિષદ યોજીને ફરી એક વખત રાહુલ ગાંધી માફી માગે તેવી માગણી કરી હતી. નડ્ડાએ કહ્યું,‘રાહુલ ગાંધીએ તેમના પાપ માટે દેશની માફી માગવી જોઈએ. પાકિસ્તાન અને કોંગ્રેસની એક જ ભાષા છે.’

ભાજપા અધ્યક્ષ જે પી નડ્ડાએ રાહુલ ગાંધીના નિવેદન પર વળતો પ્રહાર કરતાં વધુમાં કહ્યું કે કોઈ અન્ય દેશ દ્વારા ભારતની આંતરિક બાબતોમાં દરમિયાનગીરીની માંગ કરવી એ ભારતના સાર્વભૌમત્વ પર હુમલો છે. હું રાહુલ ગાંધી પાસેથી જાણવા માગું છું કે યુરોપ-અમેરિકાને ભારતની બાબતોમાં દખલગીરી કરવા માટે ઉશ્કેરવા પાછળ તેમનો ઈરાદો શું છે ? તમારે તેના માટે માફી માગવી પડશે.