Gujarat Exclusive > ગુજરાત > મધ્ય ગુજરાત > કોટ વિસ્તારમાં કોરોના બેકાબૂ, નવા નોંધાયેલા 143 કેસમાંથી 99% કરફ્યુગ્રસ્ત વિસ્તારના

કોટ વિસ્તારમાં કોરોના બેકાબૂ, નવા નોંધાયેલા 143 કેસમાંથી 99% કરફ્યુગ્રસ્ત વિસ્તારના

0
853

અમદાવાદ શહેરમાં કોરોના વાયરસ બેકાબૂ જોવા મળી રહ્યો છે. આજે એક જ દિવસમાં સાગમટે 143 કેસ સામે આવતા લોકોના જીવ તાળવે ચોંટી ગયા હતા. આ તમામ કેસમાં સૌથી વધારે કેસ કોટ વિસ્તારમાં સરકારે કર્ફયુ હોવા છતા સામે આવ્યા છે. અમદાવાદના મ્યુ. કમિશનર વિજય નેહરાના જણાવ્યા અનુસાર, અમદાવાદમાં કુલ 743 કેસ અત્યારસુધી નોંધાયા છે. જેમાં છેલ્લા 12 કલાકમાં 143 નવા કેસ ઉમેરાયા છે. જે નવા કેસ સામે આવ્યા છે તેમાં 99 ટકા કરફ્યુગ્રસ્ત વિસ્તારમાં જ આવ્યા છે.

મ્યુ. કમિશનરે જણાવ્યું હતું કે દિવસેને દિવસે અમદાવાદમાં પરિસ્થિતિ ગંભીર બનતી જાય છે, કેસોની સંખ્યા પણ વધી રહી છે. તેમણે એમ પણ કહ્યું હતું કે દુનિયામાં ક્યાંય નવા કેસ સામે આવવાનું બે-ચાર દિવસમાં બંધ થઈ જાય તેવું ક્યાંય જોવા મળ્યું નથી. બે-પાંચ ટકા લોકો હજુય કોર્પોરેશનને સહકાર ના આપતા હોવાનું કહેતા નેહરાએ જણાવ્યું હતું કે હવે આ બાબતોને આપણે સો ટકા માનવી જ પડશે.

શહેરમાં છેલ્લા 12 કલાકમાં નવા નોંધાયેલા 143 કેસોનું બ્રેકઅપ આપતા નેહરાએ જણાવ્યું હતું કે, મધ્ય ઝોન એટલે કે કોટ વિસ્તારમાં 38, દક્ષિણ ઝોનમાં 91, ઉત્તર ઝોનમાં 3, દક્ષિણ પશ્ચિમ ઝોનમાં 2, ઉત્તર પશ્ચિમ ઝોનમાં 1 અને પૂર્વ ઝોનમાં છ કેસ સામે આવ્યા છે. દક્ષિણ ઝોનના કેટલાક વિસ્તાર અને આખો મધ્ય ઝોન હાલ કરફ્યુ હેઠળ છે.

નેહરાએ જણાવ્યું હતું કે, જે વિસ્તારોમાં કરફ્યુ લાગુ કરવામાં આવ્યો છે ત્યાં હજુય લોકો મોટી સંખ્યામાં બહાર આવી રહ્યા હોવાના કારણે પરિસ્થિતિ પર કાબૂ મેળવવામાં મુશ્કેલી પડી રહી છે. શહેરમાં છેલ્લા 12 કલાકમાં ચાર લોકોના મોત પણ થયા છે અને અત્યારસુધીનો મૃત્યુઆંક 25 પર પહોંચ્યો છે. શહેરમાં 27 લોકોને ડિસ્ચાર્જ પણ કરાયા હોવાનું તેમણે જણાવ્યું હતું.

અમદાવાદમાં અત્યારસુધી 12,411 જેટલા સેમ્પલ ટેસ્ટ કરાયા છે. દેશના ચાર-પાંચ રાજ્યો સિવાય બાકીના રાજ્યોમાં કુલ જેટલા ટેસ્ટ કરાયા છે તેનાથી વધુ ટેસ્ટ અમદાવાદ શહેરમાં થઈ ચૂકયા છે. છેલ્લા 24 કલાકમાં 703 ટીમો દ્વારા 1,02,930 જેટલા ઘરોમાં સરવે કરી 4 લાખથી વધુ લોકોનું સ્ક્રિનિંગ કરી 1,705 જેટલા લોકોના સેમ્પલ લેવાયા છે.

એલજી હોસ્પિટલમાં મેડિકલ સ્ટાફને લાગેલા કોરોનાના ચેપ અંગે મ્યુ. કમિશનરે જણાવ્યું હતું કે તેમના કોન્ટેક્ટમાં આવેલા તમામ લોકોને શોધીને હાલ ક્વોરન્ટાઈનમાં રાખવામાં આવ્યા છે. બીજી બીમારીની સારવાર માટે આવતા બે દર્દીઓનો કોરોનાનો રિપોર્ટ પોઝિટિવ આવતા હવે અન્ય દર્દીઓને પણ ચકાસવામાં આવી રહ્યા હોવાનું તેમણે કહ્યું હતું.

પશ્ચિમ ઝોનમાં કોરોનાના વધતા કેસ અંગે કમિશનરે કહ્યું હતું કે આ વિસ્તારમાં મોટા પાયે કેસ નથી આવ્યા. છેલ્લા 24 કલાકમાં માત્ર બે કેસ નોંધાયા છે. રામદેવનગર અને ગુલબાઈ ટેકરાના સ્લમ વિસ્તારમાં કુલ આઠ જેટલા કેસ નોંધાયા છે. બાકીના જે કેસ છે તે એક જ પરિવારના સભ્યોને થયા હોય તેવા છે. આ વિસ્તારોમાં મોટાપાયે આઉટબ્રેક જણાયું નથી.

ગુજરાત સરકારની મોટી જાહેરાત, રાજ્યના 66 લાખ કુટુંબના ખાતામાં 1000 નાખશે